¶Comment Ulrich Gallet fut envoye devers Picrochole. Cap. xxviii.

Les letres dictees et signe es, Grandgouzier ordonna que Ulrich Gallet, maistre de ses requestes homme saige et discret, duquel en divers et contencieux affaires il avoyt esprouve la vertus et bon advys allast devers Picrochole, pour luy remonstrer ce que par eulx avoit este decrete. En celle heure partit le bon homme Gallet, et passe le gue demanda au meusnier, de l’estat de Picrochole : lequel luy feist responce que ses gens ne luy avoient laisse ny coq ny geline et qu’ilz s’estoient enserrez en la roche Clermaud, et

qu’il ne luy conseilloyt poinct de proceder oultre de peur du guet, car leur fureur estoyt enorme. Ce que facilement il creut, et pour celle nuict hebergea avecques le meusnier. Au lendemain matin, se transporta avecques la trompette a la porte du chasteau, et requist es guardes, qu’ilz le feissent parler au roy pour son profit. Les parolles annoncees au roy ne consentit aulcunement qu’on luy ouvrist la porte, mays se transporta sus le boulevard, et dist a l’embassadeur. Qu’i a il de nouveau? que voulez vous dyre? Adoncques l’embassadeur propousa comme s’ensuyt.