¶Comment Gymnaste soupplement tua le capitaine Tripet, et aultres gens de Picrochole. Chap. xxxiii.

Ces motz entenduz, aulcuns d’entre eulx commencerent avoir frayeur, et se seignoient de toutes mains, pensans que ce feust un diable desguise, et quelq’un d’eulx nomme Bon Joan, tyra ses heures de sa braguette et cria assez hault, Agios ho theos Sy tu es de dieu sy parle, sy tu es de l’aultre sy t’en va. Et pas ne s’en alloit, ce que entendirent plusieurs de la bande, et se departoient de la compaignie. Le tout notant et considerant Gymnaste. Pourtant fist semblant descendre de cheval, et quand feut pendent du couste du montouer feist soupplement le tour de l’estriviere, son espee bastarde au couste, et par dessoubz passe se lancza en l’air, et se tint des deulx piedz sus la scelle le cul tourne vers la teste du cheval. Puis dist. Mon cas va au rebours. Adoncq en tel poinct qu’il estoit feist la guambade sus un pied, tournant a senestre,

et ne faillit oncq de rencontrer sa propre assiete sans en rien varier, Dont dist Tripet, Je ne feray pas cestuy la pour ceste heure, et pour cause. Bien dist Gymnaste, j’ay failly, je vois defaire cestuy sault: lors par grande force et agilite feist en tournant a dextre la gambade comme davant. Ce faict mist le poulce de la dextre sus l’arczon de la scelle, et leva tout le corps en l’air, se soustenent tout le corps sus le muscle, et nerf dudict poulce: et ainsi se tourna troys foys, a la quatriesme se renversant tout le corps sans a rien toucher se guinda entre les deux aureilles du cheval, soudant tout le corps en l’air sus le poulce de la senestre: et en cest estat feist le tour du moulinet puys frapant du plat de la main dextre sus le meillieu de la scelle se donna tel branle qu’il se assist sus la crope, comme font les damoiselles. Ce faict tout a l’aise passe la jambe droicte par sus la scelle, et se mist en estat de chevaucheur, sus la crope. Mais dist il, mieulx vault que je me mette entre les arsons: adoncq se appoyant sus les poulces des deux mains a la crope davant soy, se renversa cul sus teste en l’air, et se trouva entre les arsons en bon maintien, puys d’un sobre sault se leva tout le corps en l’air, et ainsi se tint piedz joinctz entre les arsons, et la tournoya plus de cent tours les bras estenduz en croix, et crioyt ce faisant a haulte voix. J’enraige diables j’enraige/ j’enraige, tenez moy diables tenez moy tenez. Tandis qu’ainsi voltigeoyt, les marrouffles en grand esbahissement disoient l’un a l’aultre. Par la mer de c’est un lutin, ou un diable ainsi deguise. Ab hoste maligno libera nos domine: et s’en fuyoient a la route regardans darriere soy, comme un chien qui emporte un plumail. Lors Gymnaste voyant son adventaige descend de cheval: et desguaine son espee, et a grands coups chargea sus les plus huppez, et les ruoyt a grands monceaulx blessez, navrez, et meurtriz/ sans que nul luy resistast, pensans que ce fust un diable affame, tant par les merveilleux voltigemens qu’il avoit faict que par les propous que luy avoyt tenu Tripet, en l’appellant pauvre diable. Si non que Tripet en trahison luy voulut fendre la cervelle de son espee lancquenette/ mais il estoit bien arme, et de cestuy coup ne sentit que le chargement, et soubdain se tournant, lancea un estoc volant au dict Tripet et ce pendent que icelluy se couvroit en hault luy tailla d’un coup l’estomach le colon et la moytie du foye. dont tomba par terre, et tombant rendit plus de quatre potees de souppes, et l’ame meslee parmy les souppes. Ce faict Gymnaste se retyre considerant que les cas de hazart jamais ne fault poursuyvre jusque a leur periode: et qu’il convient a tous chevaliers reverentement traicter leur bonne fortune, sans la molester ny gehainer. Et montant sus son cheval luy donne des esprons tyrant droict son chemin vers la Vauguyon et Prelinguand avecques luy.