¶Comment Gargantua paya sa bien venue es Parisiens: et comment il print les grosses cloches de l’eglise nostre dame nostre damenostre dame. Chapi. xvi.

Quelques jours apres qu’ilz se feurent refraichiz, il visita la ville: et fut veu de tout le monde en grande admiration. Car le peuple de Paris est tant sot/ tant badault/ et tant inepte de nature: q’un basteleur/ un porteur de rogatons/ un mulet avecques ses cymbales/ un vielleux on mylieu d’un carrefou assemblera plus de gens, que ne feroyt un bon prescheur evangelicque. Et tant molestement le poursuyvirent: qu’il feut contrainct soy reposer suz les tours de l’eglise nostre dame. On quel lieu estant, et voyant tant de gens a l’entour de soy: dist clerement. Je croy que ces marroufles volent que je leur paye icy ma bien venue et mon proficiat. C’est raison. Je leur voys donner le vin. Mais ce ne sera que par rys. Lors en soubryant destacha sa belle braguette: et tyrant sa mentule en l’air, les compissa sy aigrement, qu’il en noya deux cens soixante mille,

Page [59]
quatre cens dix et huyt. Sans les femmes et petitz enfans. Quelque nombre d’yceulx evada ce pisseffort a legierete des pieds. Et quand furent au plus hault de l’universite, suans, toussans, crachans et hors d’haleine, commencerent a renier et jurer, les plagues dieu. Je renye dieu, Frandiene vez tu ben/ la merde/ po cab de bious/ das dich gots leyden schend/ pote de christo/ ventre sainct Quenet/ vertus guoy/ par sainct Fiacre de Bryesainct Fiacre de BryeBrye / sainct Treignant/ je soys veu a sainct Thibaud/ Pasques dieu, le bon jour dieu, le diable m’emport/ foy de gentilhome / Par sainct Andouille/ par sainct Guodegrin qui feut martyrize de pomes cuyttes/ par sainct Foutin l’apostre/ par sainct Vit/ par saincte mamye/ nous sommes baignez par rys. Dont feut depuis la ville nommee Paris, laquelle au paravant on appelloyt Leucece. Comme dict Strabo. lib. 4. C’est a dire en grec/ Blanchette, pour les blanches cuysses des dames dudict lieu. Et par autant que a ceste nouvelle imposition du nom tous les assistans jurerent chascun les saincts de sa paroisse: les Parisiens, qui sont faictz de toutes gens et toutes pieces, sont par nature et bons jureurs et bons juristes: et quelque peu oultrecuydez. Dont estime Joaninus de Barranco libro. de copiositate reverentiarum, que sont dictz Parrhesiens en Grecisme,
Page [60]
c’est a dire fiers en parler. Ce faict consydera les grosses cloches qu’estoient esdictes tours: et les feist sonner bien harmonieusement. Ce que faisant luy vint en pensee qu’elles serviroient bien de campanes au coul de sa jument, laquelle il vouloyt renvoyer a son pere toute chargee de fromaiges de Brye et de harans frays. De faict les emporta en son logys. Ce pendant vint un commendeur jambonnier de sainct Antoine pour faire sa queste suille: lequel pour se faire en tendre de loing, et faire trembler le lard on charnier les voulut emporter furtivement. Mais par honestete les laissa non par ce qu’elles estoient trop chauldes, mais par ce qu’elles estoient quelque peu trop pesantes a la portee. Cil ne feut pas celluy de Bourg. Car il est trop de mes amys. Toute la ville feut esmeue en sedition, comme vous scavez que a ce ilz sont tant faciles, que les nations estranges s’esbahissent de la patience, ou (pour mieulx dire) de la stupidite des Roys de France, lesquelz aultrement par bonne justice ne les refrenent: veuz les inconveniens qui en sortent de jour en jour. Pleust a dieu, que je sceusse l’officine en laquelle sont forgez ces schismes et monopoles, pour veoir si je n’y feroys pas de beaulx placquars de merde. Croyez que le lieu on quel convint le peuple tout solfre et habaline, feut Sorbone, ou lors estoit, maintenant
Page [61]
n’est plus, l’oracle de Lucece. La feut propose le cas, et remonstre l’inconvenient des cloches transportees. Apres avoir bien ergote pro et contra, feut conclud en Baralipton, que l’on envoiroyt le plus vieulx et suffisant de la faculte theologale vers Gargantua pour luy remonstrer l’horrible inconvenient de la perte d’icelles cloches. Et nonobstant la remonstrance d’aulcuns de l’universite, qui alleguoient que ceste charge mieulx competoyt a un orateur, que a un theologien, feut a cest affaire esleu nostre maistre Janotus de Bragmardo.

Réel    Hypothétique    Fictif    Mythique   
Région, contrée    Ville, village    Bâtiment    Étendue, cours d'eau    Montagne, île, ...    Autre