Comment les oiseaux de l' Isle Sonnante estoient tous passagers. CHAP. IIII.

Mais, dist Pantagruel, veu qu'exposé nous avez des Cardingaux naistre Papegaut, et les Cardingaux des Evesgaux, les Evesgaux des Prestregaux, et les Prestregaux des Clergaux, je voudrois bien entendre dont vous naissent ces Clergaux. Ils sont, dit Aeditue, tous oiseaux de passage, et nous viennent de l'autre monde: part, d'une contree grande à merveilles, laquelle on nomme Joursanspain : part d'une autre vers le Ponant laquelle on nomme Tropditieux. De ces deux contrees tous les ans à boutees ces Clergaux icy nous viennent, laissans peres et meres, tous amis et tous parens. La maniere est telle, quand en quelque noble maison de ceste contree derniere y a trop d'iceux enfans, soient masles soient femelles, de sorte que qui à tous part feroit de l'heritage, comme raison le veult, nature l'ordonne, et Dieu le commande, la maison seroit dissipee. C'est l'occasion pourquoy les parens s'en deschargent

en ceste Isle Bossard. C'est, dit Panurge, l'Isle Bouchard lez Chinon. Je dis Bossard respondit Aeditue. Car ordinairement ils sont bossus, borgnes, boiteux, manchots, podagres, contrefaits, et maleficiez, poix inutile de la terre. C'est, dit Pantagruel, coustume du tout contraire es Institutions jadis observees en la reception des pucelles Vestales, comme atteste Labeo Antistius, estoit defendu à ceste dignité eslire fille qui eust vice aucun en l'ame, ou en ses sens diminution, ou en son corps tasche quelconque, tant fust occulte et petite. Je m'esbahis, Aeditue continuant, si les meres de par delà les portent neuf mois en leurs flancs, veu qu'en leurs maisons elles ne les peuvent porter ne patir neuf ans, non pas sept le plus souvent, et leur mettans une chemise seulement sus la robbe, sur le sommet de la teste leurs couppans je ne scay quant cheveux, avec certaines parolles apotrophees et expiatoires, comme entre les Aegyptiens par certaines linostolies et rasures estoient creez les Isiacques, visiblement, apertement, manifestement par metempsichosie Pythagorique, sans lesion ne blessure aucune, les font oiseaux tels devenir que presentement les voyez. Ne scay toutesfois, beaux amis, que peult estre, ne doibt, que les femelles soient Clergesses, Monagesses, ou Abbegesses, ne chantent motets plaisans et charisteres comme on souloit faire à Oromasis, par l'institution de Zoroaster : mais catarates et sytorpees comme on faisoit au Daemon Arimanian, et font continuelles devotions de leurs parens et amis, qui en oiseaux les transformerent, je dis autant jeunes que vieilles.

Plus grand nombre nous en vient de Joursanspain, qui est excessivement long. Car les Assaphis habitans d'icelle contree quant sont en danger de patir malesuade, par non avoir dequoy soy alimenter, et ne scavoir ne vouloir rien faire, ne travailler en quelque honneste art et mestier, ne aussi feablement à gens de bien soy asservir. Ceux aussi qui n'ont peu jouir de leurs amours, qui ne sont parvenus à leurs entreprinses et sont desesperez. Ceux pareillement qui meschantement ont commis quelque cas de crime, et lesquels on cerche pour à mort ignominieuse mettre, tous avolent icy: icy ont leur vie assignee, icy soudain deviennent gras comme glirons, qui paravant estoient maigres comme pies: icy ont parfaicte seureté, indemnité et franchise.

Mais demandoit Pantagruel, ces beaux oiseaux icy une fois avolez, retournent ils jamais plus au monde ou ils furent ponnus. Quelques uns respondit Aeditue, jadis bien peu bien à tard, et à regret. Depuis certaines eclipses s'en est revolé une grande mouee par vertu des constellations celestes. Cela de rien ne nous melancolie, le demeurant n'en a que plus grande pitance. Et tous, avant que revoler, ont leur pannages laissé parmi les orties et espines. Nous en trouvasmes quelques uns reallement, et en recerchant d'aventure rencontrasmes un pot aux roses descouvert.