Comme Panurge arriva en ung pays plat qui n’est point laboure/ mais fort fertille: la ou croyssent les pastez chaulx et d’ugne Nuee dont tombent les alouettes toutes rosties/ et comme l’on y couvre les maisons de tartelettes toutes chauldes. Chapitre. XIX.

De l’aultre part de l’ung des dictz Fleuves il y a ung aultre grand pays plat qui est fort fertil, mais il n’est point laboure. Toutesfoys il

y croist si grande abundance de petitz pastes tous chauldz que c’est une chose incredible, et viennent en une nuict comme les champignons, et ceulx du pays ne vivent d’aultre chose, car incontinent que il sont leves au matin, ilz les vont cueillir par grandes pannerez comme ilz feroient fresses ou champignons.

Si tous les frians de Paris y estoient, je croy qu’ilz engresseroient bien leurs lippes et leurs barbes, car ilz sont fort bons, Tous les matins environ Soleil levant il se leve une grande nuee fort espaisse, de laquelle des que le Soleil donne dessus les alouettes en tumbent toutes rosties, et ne fault que ouvrir la bouche, car elles tumbent toutes chauldes dedans, mais il fault porter du sel qui les veult manger salees, pource qu’il n’en croist point au pays a cause que l’air y est trop doulx.

Du long des hayes dudict pays lesquelles sont d’arbres comme groseliers croissent les Tartelettes et Flannetz tous chaulx des quelz les bonnes gens du pays pour yssue de table.

Il y en croist en si grande abundance que on en couvre les maisons au lieu de thuylle ou d’ardoyse, Les petitz enfans du pays ne se desjeunent d’aultre chose.