Il y eut quelque foys ung navire de portugaloys qui deslacherent leur grosse artillerie contre luy, mais il en recepvoit les bouletz a la main

Et pource qu’ilz sont fiers et qu’ilz se dient Roys de la mer par despit il print leur navire a belle dens et l’avala tout entier sans mascher avec tout ce qui estoit dedans, dont il se trouva fort mal car audict navire y avoit bien cinq cens marmotz et autant de cinges qui luy saultoient dedans le ventre incessamment, de sorte qu’il pensoit avoir les avives.

Au moyen de quoy il fut contrainct de faire descendre son medicin c’est assavoir le dict housseur et ramoneur de cheminees dedans son ventre avec ung fouet lequel les luy fit sortir a grand coups de fouet par le trou du cul, dont les aulcuns se cacherent a l’ombre du poil qui la estoit puis en faisant une vesse les jecta tous en la mer.