Comme les coqctz chappons et poullailes chantoient dedans le ventre de Bringuenarilles. Chapitre. VII.

Et pource que souventesfoys tous les poussins qu’il esclouoit ne sortoient pas tous hors de son ventre mais demouroient dedans son corps la ou ilz croissoient si grandz qu’ilz estoient coqctz parfaictz par quoy quant il bailloit vous eussiez ouy plus de cent mille coqctz chanter dedans son ventre si melodieusement que vous eussiez pense que se eussent este orgues, trompettes, saquebutes, bucines, et haulz boys tant chantoient doulcement, Au temps que j’envoyay mon truchement par devers luy en ambassade a cause qu’il parloit bon Crailleboye qui estoit le langaige maternel dudict Bringuenarilles il estoit despite contre lesdicts coqctz pource qu’ilz l’empeschoient de faire sa digestion a cause de leur plume

par quoy il demanda conseil a mon truchement qu’il seroit bon d’y faire, Lequel luy conseilla d’avoir ung regnard tout vif, lequel il avalast tout entier sans le blesser et que sans point de faulte il les luy feroit sortir tous hors du corps ou qu’il les estrangleroit tous sans en laisser ung seul en vie, cela qu’il feit dont il se trouva fort bien, par quoy il me manda par ledict truchement qu’il estoit a mon commandement luy et ses biens.