Au Liseur Benivole Salut et Paix en Jesus le Christ.

Considerant infiniz abus estre perpetrez a cause d'un tas de Prognostications de Lovain faictes a l'ombre d'un verre de vin, je vous en ay presentement calculé une la plus sceure et veritable que feut oncques veue, comme l'experience vous le demonstrera. Car sans doubte veu que dict le Prophete Royal, Psal. v. a Dieu. Tu destruyras tous ceulx qui disent mensonges, ce n'est legier peché de mentir a son escient et abuser le pauvre monde curieux de scavoir

choses nouvelles. Comme de tout temps ont esté singulierement les Francoys, ainsi que escript Cesar en ses commentaires, et Jean de Gravot on mythologies Gallicques. Ce que nous voyons encores de jour en jour par France, ou le premier propos qu'on tient a gens fraischement arrivez sont.Quelles nouvelles? scavez vous rien de nouveau? Qui dict? qui bruyt par le monde? Et tant y sont attentifz, que souvent se courroussent contre ceulx qui viennent de pays estranges sans apporter pleines bougettes de nouvelles, les appellant veaulx et idiotz.Si doncques comme ilz sont promptz a demander nouvelles autant ou plus sont ilz faciles a croire ce que leur est annoncé, debvroit on pas mettre gens dignes de foy a gaiges a l'entree du Royaulme qui ne serviroyent d'aultre chose sinon d'examiner les nouvelles qu'on y apporte, et a scavoir si elles sont veritables? Ouy certes.Et ainsi a faict mon bon maistre Pantagruel par tout le pays de Utopie, et Dipsodie, Aussi luy en est il si bien advenu et tant prospere son territoire, qu'ilz ne peuvent de present avanger a boyre, et leur conviendra espandre le vin en terre, si d'ailleurs ne leur vient renfort de beuveurs et bons raillars.Voulant doncques satisfaire a la curiosité de tous bons compaignons, j'ay revolvé toutes les Pantarches des cieulx, calculé les quadratz de la Lune, crocheté tout ce que jamais penserent tous les astrophiles, hypernephelistes, Anemophylaces, Uranopetes, et Ombrophores, et confere du tout avecques Empedocles, lequel se recommande a vostre bonne grace.Et tout le tu autem ay icy en peu de chapitres redige, vous asseurant que je n'en dis sinon ce que j'en pense, et n'en pense sinon ce que en est, et n'en est aultre chose pour toute verite que ce qu'en lirez a ceste heure. Ce que sera dict au parsus, sera passe au gros tamys a tors et a travers, et par adventure adviendra, par adventure n'adviendra mie.D'un cas vous advertys. Que si ne croyez le tout vous me faictes un maulvais tour, pour lequel ycy ou ailleurs serez tresgriefvement puniz. Les petites anguillades a la saulse de ners bovins ne seront espargnées suz vos espaules, et humez de l'air comme de huytres tant que vouldrez. Car hardiment il y aura de bien chauffez, si le fournier ne s'endort.Or mouchez voz nez petitz enfans: et vous aultres vieux resveurs affustez voz bezicles et pesez ces motz au pois du Sanctuaire.