Privilege du Roy.

Henri par la grace de Dieu Roy de France, au Prevost de Paris, Bailly de Rouen, Seneschaulx de Lyon, Tholouze, Bordeaux, Daulphiné, Poictou, et à tous nos aultres justiciers et officiers, ou a leurs lieutenants, et a chascun d’eulx si comme a luy appartiendra, salut et dilection. De la partie de notre cher et bien ayme M. François Rabelais docteur en medicine, nous a esté exposé que icelluy suppliant ayant par cy devant baillé a imprimer plusieurs livres: en Grec, Latin, François, et Thuscan, mesmement certains volumes des faicts et dicts Heroïques de Pantagruel, non moins utiles que delectables: les Imprimeurs auroient iceulx livres corrompuz, depravez, et pervertiz en plusieurs endroictz. Auroient d’avantage imprimez plusieurs autres livres scandaleux, ou nom dudict suppliant, a son grand desplaisir, prejudice, et ignominie par luy totalement desadvouez comme faulx et supposez: lesquelz il desireroit soubs nostre bon plaisir et volonté supprimer. Ensemble les autres siens advouez, mais depravez et

desguisez, comme dict est, reveoir et corriger et de nouveau reimprimer. Pareillement mettre en lumiere et vente la suitte des faicts et dicts Heroïques de Pantagruel. Nous humblement requerant surce, luy octroyer nos letres a ce necessaires et convenables. Pource est il que nous enclinans liberalement a la supplication et requeste dudict M. François Rabelais, exposant et desirans le bien et favorablement traicter en cest endroict. A icelluy pour ces causes et autres bonnes considerations a ce nous mouvans, avons permis accordé et octroyé. Et de nostre certaine science pleine puissance et auctorité Royal, permettons accordons et octroyons par ces presentes, qu’il puisse et luy soit loisible par telz imprimeurs qu’il advisera faire imprimer, et de nouveau mettre et exposer en vente tous et chascuns lesdicts livres et suitte de Pantagruel par luy composez et entreprins, tant ceulx qui ont ja esté imprimez, qui seront pour cest effect par luy reveuz et corrigez. Que aussi ceulx qu’il delibere de nouvel mettre en lumiere. Pareillement supprimer ceulx qui faulcement luy sont attribuez. Et affin qu’il ayt moyen de supporter les fraiz necessaires a l’ouverture de ladicte impression: avons par ces presentes tresexpressement inhibé et deffendu, inhibons et deffendons a tous autres libraires et imprimeurs de cestuy nostre Royaulme, et autres nos terres et seigneuries, qu’ilz n’ayent a imprimer ne faire imprimer mettre et exposer en vente aucuns des dessusdicts livres, tant vieux que nouveaux durant le temps et terme de dix ans ensuivans et consecutifz, commençans au jour et dacte de l’impression desdicts livres sans le vouloir et consentement dudict exposant, et ce sur peine de confiscation des livres qui se trouverront avoir esté imprimez au prejudice de ceste nostre presente permission et d’amende arbitraire.

Si voulons et vous mandons et a chascun de vous endroict soy et si comme a luy appartiendra, que nos presens congé licence et permission, inhibitions et deffenses, vous entretenez gardez et observez. Et si aucuns estoient trouvez y avoir contrevenu, procedez et faictes proceder a l’encontre d’eulx, par les peines susdictes et autrement. Et du contenu cy dessus faictes, ledict suppliant jouyr et user plainement et

paisiblement durant ledict temps a commencer et tout ainsi que dessus est dict. Cessans et faisans cesser tous troubles et empeschemens au contraire: car tel est nostre plaisir. Nonobstant quelzconques ordonnances, restrinctions, mandemens, ou deffenses a ce contraires. Et pource que de ces presentes lon pourra avoir a faire en plusieurs et divers lieux, Nous voulons que au vidimus d’icelles, faict soubs seel Royal, foy soit adjoustée comme a ce present original. Donné a sainct Germain en laye le sixiesme jour d’Aoust, L’an de grace mil cinq cens cinquante, Et de nostre regne le quatreiesme.

Par le Roy, le cardinal de Chastillon praesent. Signé Du Thier.