Comment nous visitasmes le pays de Satin. CHAP. XXIX.

Joyeux d'avoir veu la nouvelle religion des freres Fredons, navigasmes par deux jours: au troisiesme, descouvrit nostre Pilot une Isle, belle et delicieuse sur toutes autres on l'appelloit l' Isle de'Frize : car les chemins estoient de Frize. En icelle estoit le pays de Satin, tant renommé entre les pages de Cour: duquel les arbres et herbe jamais ne perdoient fleur ne feuilles, et estoient de damas, et velous figuré: Les bestes et oiseaux estoient de tapisserie. Là nous vismes plusieurs bestes, oiseaux et arbres, tels que les avons de par deça, en figure, grandeur, amplitude et couleur: excepté qu'ils ne mangeoient rien, et point ne chantoient, point aussi ne mordoient ils, comme font les nostres, plusieurs aussi y vismes que n'avions encores veu: entre autres y vismes divers Elephans, en diverse contenance sur tous j'y notay les six masles

et six femelles, presentez à Rome en theatre, par leur instituteur, au temps de Germanicus nepveu de l' Empereur Tibere, Elephans doctes, Musiciens, Philosophes, danseurs, pavaniers, baladins, et estoient à table assis en belle composition, beuvans et mengeans, en silence, comme beaux-peres au refectouer. Ils ont le museau long de deux coudees, et le nommons proboscide, avec lequel ils puisent eau, pour boire, prennent palmes, prunes, toutes sortes de mangeaille, s'en deffendent et offendent comme d'une main: et au combat jettent les gens haut en l'air, et à la cheute les font crever de rire. Ils ont joinctures et articulations es jambes: ceux qui ont escrit le contraire, n'en veirent jamais qu'en peinture, entre leurs dents ils ont deux grandes cornes, ainsi les appelloit Juba, et dit Pausanias estre cornes, non dents: Philostrate tient que soient dents, non cornes: ce m'est tout un, pourveu qu'entendiez que c'est le vray yvoire, et sont longues de trois ou quatre coudees, et sont en la mandibule superieure, non inferieure. Si croyez ceux qui disent le contraire, vous en trouverez mal: voire fust-ce Elian, tiercelet de menterie. Là, non ailleurs, en avoit veu Pline, dansans aux sonnettes sus cordes, et funambules: passans aussi sus les tables en plain banquet, sans offenser les beuveurs beuvans.

J'y vy un Rhinoceros du tout semblable à celuy que Henry Clerberg m'avoit autrefois monstré, et peu differoit d'un verrat, qu'autrefois j'avois veu à Limoges : excepté, qu'il avoit une corne au mufle, longue d'une coudee, et pointue, de laquelle il osoit entreprendre contre un Elephant en combat, et d'icelle le poignant sous le ventre (qui est la plus tendre et debile partie de l'Elephant) le rendoit mort par terre. J'y vy trente deux Unicornes: c'est une beste felonne à merveilles, du tout semblable à un beau cheval: excepté qu'elle a la teste comme un Cerf, les pieds comme un Elephant, la queuë comme un sanglier, et au front une corne aigue, noire, et longue de six ou sept pieds: laquelle ordinairement luy pend en bas, comme la creste d'un coq d' Inde : elle quand veut combattre, ou autrement s'en ayder, la leve roide et droite. Une d'icelles je vy accompagnee de divers animaux sauvages, avec sa corne emunder une fontaine: là, me dist Panurge, que son courtaut ressembloit à ceste Unicorne, non en longueur du tout, mais en vertu et en proprieté: Car, ainsi comme elle, purifioit l'eau des mares et fontaines, d'ordure ou

venin aucun qui y estoit, et ces animaux divers en seureté venoient boire apres elle, ainsi seurement on pouvoit apres luy fatrouiller sans danger de chancre, verole, pisse-chaude, poullains, greues, et tels autres menus suffrages: car si mal aucun estoit au trou mephitique il esmondoit tout, avec sa corne nerveuse. Quant, dist frere Jehan, vous serez marié, nous ferons l'essay sur vostre femme, pour l'amour de dieu soit, puis que nous en donnez instruction fort salubre. Voire, respondit Panurge, et soudain en l'estomac la belle petite pilulle agregative de dieu, composee de vingt-deux coups de pongnart, à la Cesarine: mieux vaudroit, disoit frere Jehan, une tasse de quelque bon vin frais. J'y vy la toison d'or, conquise par Jason : ceux qui ont dit n'estre toison, mais pomme d'or, par ce que, mhla, signifie pomme et brebis, avoient mal visité le pays de Satin. J'y vy un Chameleon, tel que le descrit Aristoteles, et tel, que me l'avoit quelquefois monstré Charles Marais, medecin insigne en la noble cité de Lyon sur le Rosne : et ne vivoit que d'air, non plus que l'autre.

J'y vy trois Hidres, telles qu'en avois ailleurs autrefois veu: Ce sont Serpens, ayans chascun sept testes diverses. J'y vy

quatorze Phoenix. J'avois leu en divers autheurs qui n'en estoit qu'un, en tout le monde, pour un aage: mais selon mon petit jugement, ceux qui en ont escrit n'en veirent onques ailleurs, qu'au pays de tapisserie: voire fust-ce Lactance Firmian. J'y vy la peau de l'Asne d'or d' Apulee. J'y vy trois cens et neuf Pelicans. Six mille et seize oiseaux Seleucides, marchans en ordonnance, et devorans les sauterelles parmy les bleds: des Cynamolges, des Argithiles, des Caprimulges, des Thynnuncules, des Crotenotaires, voire, dis-je, des Onocrotales avec leur grand gosier: des Stymphalides harpies, Pantheres, Dorcades, Cemades, Cynocephales, Satyres, Cartasonnes, Tarandes, Ures, Monopes, Pephages, Cepes, Neares, Steres, Cercopiteques, Bisons, Musimones, Bytures, Ophyres, Stryges, Gryphes.

J'y vy la my-caresme à cheval: la my- aoust, et la my-mars luy tenoient l'estaphe: Loups-garoux, Centaures, Tygres, Leopards, Hyennes, Cameleopardales, Origes. J'y vy une Remore, poisson petit, nommé Echeneis des Grecs, aupres d'une grande nauf, laquelle ne se mouvoit, encores qu'elle eust pleine voile en haute mer: je croy bien que c'estoit celle de Periander le tyran,

laquelle un poisson tant petit arrestoit contre le vent. Et en ce pays de Satin, non ailleurs, l'avoit veuë Mutianus. Frere Jean nous dist, que par les Cours de Parlement, souloient jadis regner deux sortes de poisson, lesquels faisoient de tous poursuyvans nobles, Roturiers, pauvres, riches, grands, petits, pourrir les corps, et enrager les ames. Les premiers estoient poissons d'Avril: ce sont maquereaux: les seconds benefiques remores: c'est sempiternité de proces sans fin de jugement. Icy vy des Sphynges, des Raphes, des Oinces, des Cephes, lesquels ont les pieds de devant comme les mains, et ceux de derriere comme les pieds d'un homme: des Crocutes, des Eales, lesquels sont grands comme hippopotames, la queuë comme Elephans, les mandibules comme Sangliers, les cornes mobiles, comme sont les aureilles d'Asne: des Cucrocutes bestes tres-legeres, grandes comme Asnes de mirebalais, ont le col, la queuë et poitrine comme un Lion, les jambes comme un Cerf, la gueule fendue jusques aux aureilles, et n'ont autres dents qu'une dessus, et une autre dessous: elles parlent de voix humaine, mais lors mot ne sonnerent. Vous dites qu'on ne vit onques Aire de sacre: vrayement j'y en vy onze, et le notez bien. J'y vy des hallebardes gaucheres, ailleurs n'en avois veu. J'y vy des Menthichores, bestes bien estranges, elles ont le corps comme un Lion, le poil rouge, la face et les aureilles comme un homme, trois rangs de dents entrant les unes dedans les autres, comme si vous entrelassiez les doigts des deux mains les uns dedans les autres: en la queuë elle ont un aiguillon, duquel elles poignent, comme font les Scorpions: et ont la voix fort melodieuse. J'y vy des Catoplepes, bestes sauvages, petites de corps, mais elles ont les testes grandes, sans proportion, à peine les peuvent lever de terre, elles ont les yeux tant veneneux, que quiconques les voit meurt soudainement, comme qui verroit un basilic. J'y vy des bestes à deux dos, lesquelles me sembloient joyeuses à merveilles et copieuses en culetis, plus que n'est la mocitelle, aveques sempiternel remuement de cropions. J'y vy des escrevisses laictees, ailleurs jamais n'en avois veu, lesquelles marchoient en mout belle ordonnance, et les faisoit mout bon veoir.