Comment nous passames le Guichet habité par Grippe-minaud archiduc des Chats-fourrez. CHAP. XI.

De la passames condemnation, qui est une autre Isle toute deserte: passames aussi le guichet, auquel lieu Pantagruel ne voulut descendre, et fist tresbien: Car nous y fusmes faits prisonniers, et arrestez de faict par le commandement de Grippeminaud archiduc des Chats-fourrez. Parce que quelqu'un de nostre bande voulut vendre à un serrargent des chapeaux de cassade. Les Chats fourrez sont bestes moult horribles et espouventables: ils mangent les petits enfans, et paissent sus des pierres de marbre. Advisez beuveurs s'ils ne devroient bien estre camus. Ils ont le poil de la peau non hors sortant, mais au dedans caché: et portent pour leur symbole et devise tous et chascun d'eux une gibbeciere ouverte: mais non tous en une maniere: car aucuns la portent attachee au col en escharpe, autres sus le cul, autres sus la bedaine autres sur le costé, et le tout par raison et mistere. Ont aussi les griphes tant fortes, longues, et asserees, que rien ne leurs eschappe, depuis qu'une fois l'ont mis entre leurs serres. Et se couvrent les testes aucunefois de

bonnets à quattre gouttieres, ou braguet-:tes autres de bonnets à revers, autres de mortiers, autres de caparassons mortifiez. Entrans en leur tapinaudiere nous dist un gueux de l'hostiere, auquel avons donné demy teston: gens de bien Dieu vous doint de leans bien tost en santé sortir: considerez bien le minois de ces vaillans pilliers, arboutans de justice Grippe-minaudiere. Et notez que si vivez encore six Olympiades et l'aage de deux chiens, vous verrez ces Chats-fourrez seigneurs de toute l' Europe et possesseurs pacifiques de tout le bien et dommaine qui est en icelle, si en leurs hoirs, par divine punition, soubdain ne deperissoit le bien et revenu par eux injustement acquis: tenez-le d'un gueux et bien. Parmy eux regne la sexte essence, moyennent laquelle ils grippent tout, devorent tout, et conchient tout: ils bruslent, esclattent, decapitent, meurdrissent, emprisonnent, ruinent et minent tout sans discretion de bien et de mal. Car parmy eux vice est vertu appellee: meschanceté est bonté surnommee: trahison à nom de feauté: larrecin est dict liberalité: pillerie est leur devise, et par eux faicte, est trouvee bonne de tous humains, exceptez moy les heretiques, et le tout font avec souveraine et irrefragable authorité. Pour signe de mon pronostic adviserez que leans sont les mangeoires au dessus des rasteliers. De ce quelque jour vous souvienne. Et si jamais pestes au monde, famine, ou guerres, vorages, cateclismes, conflagrations, mal'heur adviennent, ne les attribuez, ne les referez aux conjunctions des planettes malefiques, aux abus de la cour Romaine, ou tyrannie des Roys et Princes terriens, à l'imposture des caphars, heretiques, faux prophetes, à la malignité des usuriers, faux monnoyeurs, rongneurs de testons, n'a l'ignorance, impudence, imprudence des medecins, cirurgiens, apoticaires, n'a la perversité des femmes adulteres, venefiques, infanticides: attribuez le tout à l'énorme, indicible, incroiable, inestimable meschanceté, laquelle est continuellement forgee et exercee en l'officine des Chats- fourrez: et n'est au monde congnue, non plus que la cabale des Juifs: pourtant n'est- elle detestee, corrigee, et punie, comme seroit de raison. Mais si elle est quelque jour mise en evidence, et manifesté au peuple, il n'est, et ne fut Orateur tant eloquent, qui par son art le retint: ne loy tant rigoureuse et drachonique, qui par crainte de peine le gardast: ne magistrat tant puissant qui par force l'empeschast, de les faire tous vifs la dedans leur rabuliere felonnement brusler. Leurs enfans propres Chats-fourrillons et autres parens les avoyent en horreur et abomination. C'est pourquoy aussi que Hannibal eut de son pere Amilcar, souz solennelle et religieuse adjuration, commandement de persecuter les Romains, tant qu'il vivroit: ainsi ay-je de feu mon pere injonction icy hors demeurer attendant que la dedans tombe la fouldre du Ciel, et en cendre les reduise, comme autres Titanes, prophanes, et theomaches: puisque les humains tant et tant sont des corps endurciz, que le mal parmy eux advenu, advienent et à venir ne recordent, ne sentent, ne prevoyent: ou le sentens n'osent, ne veulent, ne peuvent les exterminer. Qu'esse celà, dist Panurge, ha non non je n'y vois pas par Dieu, retournons. Retournons dis-je de par Dieu. Ce noble gueux m'a plus fort estonné, que si du Ciel en automne eust tonné. Retournans trouvames la porte fermee: et nous fut dict, que la facilement on y entroit, comme en Averne. A issir restoit la difficulté, et que ne sortirions hors en maniere que ce fust, sans bulletin et descharge de l'assistance: par ceste seule raison, qu'on ne s'en va pas des foyres, comme du marché, et qu'avons les pieds pouldreux. Le pis fut, quant passames le Guichet. Car nous fusmes presentez pour avoir nostre bulletin et descharge, devant un monstre le plus hideux, que jamais fut descrit. On le nommoit Grippe-minaud. Je ne vous le sçaurois mieux comparer, qu'a Chimere, ou à Sphinx et Cerberus, ou bien au simulachre d' Osiris, ainsi que le figuroyent les Egyptiens, par trois testes ensemble joinctes: savoir est d'un lyon rugient, chien flattant, et d'un loup baislant, entortillees d'un dragon soy mordant la queuë, et de rayons scintillans à l'entour. Les mains avoit plaines de sang, les griphes comme de harpye, le museau à bec de corbin, les dens d'un sanglier quadrannier, les yeux flamboyans comme une gueule d'enfer, tout couvert de mortiers entrelassez de pillons, seulement apparoissoyent les griphes. Le siege d'iceluy et de tous ses collateraux Chats garaniers, estoit d'un long rattelier toutneuf,au dessus duquel par forme de revers instablees estoient mangeoires fort amples et belles, selon l'advertissement du gueux. A l'endroit du siege principal, estoit l'image d'une vieille femme, tenant en main dextre un fourreau de faucille, en senestre une ballance, et portant bezicles au nez. Les coupes de la ballance estoient de deux gibbescieres veloutees: l'une pleine de billon, et pendente, l'autre vuide et longue eslevee au dessus du tresbuchet. Et suis d'opinion que c'estoit le pourtraict de justice Grippe-minaudiere, bien abhorrente de l'institution des antiques Thebains: qui erigeoyent les statues de leurs Dicastes, et juges apres leur mort en or et argent, en marbre selon leur merite, toutes sans mains. Quant fusmes devant luy presentez ne sçay quelle sorte de gens, tous vestus de gibbescieres, et de sacs, à grans lambeaux d'escritures nous firent sus une selette asseoir. Panurge disoit, gallefretiers mes amis je ne suis que trop bien ainsi debout: aussi bien est elle trop basse pour homme qui à chausses neufves, et court pourpoint. Assoyez vous la, respondirent ils, et que plus on ne vous le die. La terre presentement s'ouvrira, pour tous vifs vous engloutir si faillez à bien respondre.