Comment l' Isle Sonnante avoit esté habitee par les Siticines lesquels estoyent devenuz oiseaux. CHAP. II.

Nos jeusnes parachevez l'hermite nous bailla une lettre adressante à un qu'il nommoit Albian camat, maistre Aeditue

de l' Isle sonnante, mais Panurge le saluant l'appela maistre Antitus. C'estoit un petit bon-homme vieux, chauve, à muzeau bien enluminé, et face cramoisie. Il nous fist tresque bon recueil par la recommandation de l'hermite, entendant qu'avions jeusné comme a esté declaré. Apres avoir tres-bien repeu nous exposa les singularitez de l'Isle, affermant qu'elle avoit premierement esté habitee par les Siticines, mais par ordre de nature comme toutes choses varient, ils estoient devenus oiseaux. Là j'eus pleine intelligence de ce qu' Atteius Capito, Pollux, Marcellus, A. Gellius, Athenaeus, Suidas, Ammonius, et autres avoyent escrit des Siticines et Sicinnistes et difficile, ne nous sembla croire les transformations de Nyctimene, Progne, Itys, Alcmene, Antigone, Tereus, et autres oiseaux. Peu aussi de doubte fismes des enfans Matrobrine convertis en Cignes, et des hommes de Pallene en Thrace, lesquels soubdain que par neuf fois se baignent au palude Tritonique, sont en oiseaux transformez. Depuis autre propos ne nous tint que de cages et d'oiseaux. Les cages estoient grandes, riches, somptueuses, et faictes par merveilleuse architecture.

Les oiseaux estoient grands, beaux et

polis à l'avenant, bien resemblans les hommes de ma patrie, beuvoient et mangeoient comme hommes, esmoutissoient comme hommes, pedoient et dormoient et roussinoient comme hommes, brief à les veoir de prime face eussiez dit que fussent hommes, toutesfois ne l'estoient mie, selon l'instruction de maistre Aeditue : mais protestant qu'ils n'estoient ny seculiers ny mondains. Aussi leur pennage nous mettoit en resverie, lequel aucuns avoient tout blanc, autres tout noir, autres tout gris, autres miparti de blanc et noir, autres tout rouge, autres partis de blanc et bleu, c'estoit belle chose de les veoir. Les masles il nommoit Clergaux, Monagaux, Prestregaux, Abbegaux, Evesgaux, Cardingaux, et Papegaut, qui est unique en son espece. Les femelles il nommoit Clergesses, Monagesses, Prestregesses, Abbegesses, Evesgesses, Cardingesses, Papegesses. Tout ainsi toutefois nous dist-il comme entre les abeilles hantent les freslons, qui rien ne font fors tout manger et tout gaster, aussi depuis trois cens ans ne scay comment entre ces joyeux oiseaux estoit par chascune quinte lune avolé grand nombre de cagots lesquels avoient honny et conchié toute l'Isle tant hideux et monstrueux que de tous estoient reffuis. Car tous avoient le col tors, et les pattes pelues, les griphes et ventre de harpies, et les culs de Stimphalides, et n'estoit possible les exterminer, pour un mort en avoloit vingt quatre. Je y souhaitoye quelque second Hercules pour ce que frere Jehan y perdit le sens par vehemente contemplation, et à Pantagruel advint ce qu'estoit advenu à messire Priapus, contemplant les sacrifices de Ceres, par faute de peau.