Comment avoir prins congé de Bacbuc delaissent l' Oracle de la Bouteille. CHAP. XLVII.

D'icy, respondit Bacbuc, ne sois en esmoy, à tout sera satisfaict, si de nous estes contens. Cà bas en ces regions circoncentrales nous establissons le bien souverain, non en prendre, et recevoir, ains en eslargir et donner, et heureux nous reputons, non si d'autruy prenons et recevons beaucoup, comme paraventure decretent

les sectes de vostre monde, ains si à autruy tousjours eslargissons, et donnons beaucoup Seulement vous prie, vos noms, et païs icy en ce livre ritual par escrit nous laisser, lors ouvrit un beau et grand livre, auquel nous dictans, une de ses mystagogues excepvant, furent, avecques un stile d'or, quelques traits projectez, comme si l'on eust escrit, mais de l'escriture rien ne nous apparoissoit.

Cela fait nous emplit trois oires de l'eau phantastique, et manuellement nous les baillant, dist: allez amis en protection de ceste sphere intellectuale, de laquelle en tous lieux est le centre, et n'a en lieu aucun circonferance, que nous appellons dieu. Et venus en vostre monde portez tesmoignage que sous terre sont les grands tresors, et choses admirables, et non à tort Ceres ja reveree par tout l'univers, par ce qu'elle avoit monstré, et enseigné l'art d'agriculture, et par invention de bled, aboly entre les humains le brutal aliment de gland, a tant et tant lamenté, de ce que sa fille fut en nos regions subterraines ravie: certainement prevoyant que sous terre plus trouveroit sa fille de biens et excellences, qu'elle sa mere n'avoit faict dessus. Qu'est devenu l'art d'evoquer des cieux

la foudre, et le feu celeste jadis inventé par le sage Prometheus ? vous certes l'avez perdu, il est de vostre hemisphere departy, icy sous terre est en usage. Et à tort quelquefois vous esbahissez voyans villes conflagrer et ardre par foudre et feu Etheré, et ignorans de qui, et par qui, et quelle part tiroit cestuy esclandre horrible à vostre aspect, mais à nous familier et utile. Vos Philosophes qui se complaignent toutes choses estre par les anciens escriptes, rien ne leur estre laissé de nouveau à inventer, ont tort trop evident. Ce que du ciel vous apparoist, et appellez Phenomenes, ce que la terre vous exhibe, ce que la mer et autres fleuves contiennent, n'est comparable à ce qui est en terre caché. Pourtant est equitablement le soubterrain dominateur presques en toutes langues nommé par epithete de richesses. Ils quant leur estude addonneront et labeur à bien rechercher par imploration de Dieu souverain, lequel jadis les Egyptiens nommoient en leur langue l'abscond, le mussé, le caché, et par ce nom l'invoquant supplioient à eux se manifester et descouvrir, leur eslargira cognoissance et de soy et de ses creatures, par aussi conduits de bonne Lanterne. Car tous Philosophes et sages Antiques à bien seurement et plaisamment parfaire le chemin de la congnoissance divine et chasse de sapience, ont estimé deux choses necessaires, guyde de Dieu, et compagnie d'homme. Ainsi entre les Philosophes, Zoroaster print Arimaspes pour compagnon de ses peregrinations, Esculapius, Mercure, Orpheus, Musee, Pythagoras, Agleopheme : entre les Princes et gens belliqueux, Hercules eut en ses plus difficilles entreprinses pour amy singulier Theseus, Ulysses, Diomedes, Eneas, Achates.

Vous autres en avez autant fait, prenans pour guide vostre illustre dame Lanterne. Or allez de par Dieu qui vous conduie.

Fin du cinqieme livre des faicts et dicts heroïques du noble Pantagruel.