ODE SAPPHICA R. D. IO..

Mercuri interpres superûm, venusto
Ore qui mandata refers vicissim,
Gratus hos circum volitans, et illos,
Praepete cursu,
Adueni sanctis patribus, senique,
Praesidet qui concilio deorum,
Quem sui spectat soboles Quiritum
Numinis instar.
Dic iubar, quod Sequanidas ad vndas
Edidit Gallis Italisque mixtim
Diua, quam primum Tyberi tenellam
Credidit Arnus,
Tritonum post hanc cominante turba
Phocidum celsas subiisse turres,
Nec procellosum timuisse vidit
Nereis aequor.
O diem Hetruscis populis colendum,
Et simul Francis iuueni puellam
Qui dedit, forma, Genio, decore,
Ore coruscam!
Fauste tunc in quos Hymenaee, quos tu
In iocos Cypri es resoluta! vel quas
Iuno succendit veniente primum
Virgine taedas!
Vt tibi noctes Catharina laetas,
Vt dies Errice tibi serenos,
Demum vt ambobus, sobolisque fausta est
Cuncta precata!
Vt deam primo dea magna partu
Iuuit! vt nec defuerit subinde,
Quartus vt matri quoque nunc per illam
Rideat infans.
Quartus is, quem non superi dedere
Galliae tantum: sibi nanque partem
Vendicat, festisque vocat iuuentus
Nostra choreis.
Laeta si Franciscum etenim iuuentus
Hunc petat, cui res pater ipse servat
Gallicas, et cui imperium spopondit
Iuppiter orbis:
Prouocet diuos hominesque tentet
Pensa fatorum: fuerit Latinis
Et satis Tuscis apibus secundos
Carpere flores.
Nam sibi primos adimi nec ipsae
Gratiae Errici comites perennes,
Nec sinat raucis habitans Bleausi
Nympha sub antris.
Nec magis vos ô Latio petitae
Celticis, sed iam Laribus suetae, et
Vocibus Musae, ac patriis canentes
Nunc quoque plectris.
Et puellarum decus illud, vna
Margaris tantum inferior Minerua,
Ac Nauarraeae specimen parentis
Iana reclamet.
Ne quidem Nympha id probet illa, ab imis
Quae Padi ripis iuuenem secuta est,
Si Parim forma, tamen et pudicum
Hectora dextra.
Nec tuos haec quae patefecit ignes
Ignibus praeclare aliis Horati,
Cuncta dum clamant tibi iure partam
Esse theatra.
Tu licet nostro à Genio tributam ob
Gratiam nil non Catharina nobis
Debeas, nostro at Geniotuoque hεic
Ipsa repugnes.
Spe parum nixis igitur suprema
Sorte contentis media, faueto,
Et recens per te in Latios feratur
Flosculus hortos.
At nihil matrem moueat, quòd ipsis
Vix adhuc ex vberibus sit infans
Pendulus, nullae hεic aderant daturae
Vbera matres?
Nec tamen lac Romulidum parenti
Defuit: néue hεic quiriteris, esse
Lustricas nondum puero rogatum
Nomen ad vndas.
Nominis si te metus iste tangit,
Sistere infantem huc modò ne grauere,
Diique, diuaeque hunc facient, et omnis
Roma Quirinum.

Τελος.