De la genealogie et antiquite de Gargantua. Chap j.

Je vous remectz a la grande chronicque Pantagrueline re congnoistre la genealogie et antiquite dont nous est venu

Gargantua, En icelle vous entendrez plus au long comment les Geands nasquirent en ce monde: et comment d'iceulx par lignes directes yssit Gargantua pere de Pantagruel : et ne vous faschera, si pour le present je m'en deporte. Combien que la chose soit telle, que tant plus seroit remembree, tant plus elle plairoit a voz seigneuries comme vous avez l'autorite de Platon in Philebo et Gorgias, et de Flacce, qui dict estre aulcuns propos telz que ceulx cy sans doubte, qui plus sont delectables, quand plus souvent sont redictz.

Pleust a dieu q'un chascun sceust aussi certainement sa genealogie, depuis l'arche de Noe jusques a cest eage. Je pense que plusieurs sont aujourdhuy empereurs, Roys, ducz, princes, et Papes, en la terre, lesquelz sont descenduz de quelques porteurs de rogatons et de coustretz. Comme au rebours plusieurs sont gueux de l'hostiaire, souffreteux, et miserables: lesquelz sont descenduz de

sang et ligne de grandz roys et empereurs Attendu l'admirable transport des regnes et empires.

Des Assyriens es Medes. Des Medes es Perses. Des Perses es Macedones. Des Macedones es Romains. Des Romains es Grecz. Des Grecz es Francoys.

Et pour vous donner a entendre de moy qui parle, je cuyde que soye descendu de quelque riche roy ou prince au temps jadis. Car oncques ne veistes homme, qui eust plus grande affection d'estre roy et riche que moy: affin de faire grand chere: pas ne travailler, poinct ne me soucier, et bien enrichir mes amys et tous gens de bien et de scavoir. Mais en ce je me reconforte, que en l'aultre monde je le seray: voyre plus grand que de present ne l'auseroye soubhaitter. Vous en telle ou meilleure pensee reconfortez vostre malheur, et beuvez fraiz si faire se peut.

Retournant a noz moutons je vous

dictz que par don souverain des cieulx nous a este reservee l'antiquité et genealogie de Gargantua, plus entiere que nulle aultre, Exceptez celle du messias, dont je ne parle, car il ne me appartient, aussi les diables (ce sont les calumniateurs et caffars) se y opposent. Et fut trouvee par Jean Audeau, en un pré qu'il avoit pres l'arceau gualeau au dessoubz de L'olive, tirant a Narsay. Duquel faisant lever les fossez, toucherent les piocheurs de leurs marres, un grand tombeau de bronze long sans mesure: car oncques n'en trouverent le bout, par ce qu'il entroit trop avant les excluses de Vienne. Icelluy ouvrans en certain lieu signé au dessus d'un goubelet, a l'entour duquel estoit escript en lettres Ethrusques, Hic bibitur, trouverent neuf flaccons en tel ordre qu'on assiet les quilles en Guascoigne. Des quelz celluy qui au mylieu estoit, couvroit un gros, gras grand, gris, joly, petit, moisy, livret, plus mais non mieulx sentent que roses.

En icelluy fut ladicte genealogie trouvee escripte au long, de lettres cancelleresques, non en papier, non en parchemin, non en cere: mais en escorce D'ulmeau, tant toutesfoys usees par vetusté, qu'a poine en povoit on troys recongnoistre de ranc.

Je (combien que indigne) y fuz appelle: et a grand renfort de bezicles practicant l'art dont on peut lire lettres non apparentes, comme enseigne Aristoteles, la translatay, ainsi que veoir pourrez en Pantagruelisant, c'est a dire, beuvans a gre, et lisans les gestes horrificques de Pantagruel. A la fin du livre estoit un petit traicte intitule, Les Fanfreluches antidotees. Les ratz et blattes ou (affin que je ne mente) aultres malignes bestes avoient brousté le commencement, le reste j'ay cy dessoubz adjouste, par reverence de l'antiquaille.