Page Fu.70.

Comment Gargantua employoit le temps quand l'air estoit pluvieux. Chap. xxiiij.

S'Il advenoit que l'air feust pluvieux et intemperé, tout le temps d'avant disner estoit employe comme de coustume, excepte qu'il faisoit allumer un beau et clair feu, pour corriger l'intemperie de l'air. Mais apres disner en lieu des exercitations: ilz demouroient en la maison et par maniere de Apotherapic s'esbatoient a boteler du foin, a fendre et seier du boys et a batre les gerbes en la grange. Puys estudioient en l'art de paincture: et sculpture: ou revocquoient en usage l'anticque jeu des tables, ainsi qu'en a escript Leonicus, et comme y joue nostre bon amy Lascaris.

En y jouant recoloient les passaiges des auteurs anciens es quelz est faicte mention ou prinse quelque metaphore sus iceluy jeu: Semblablement ou alloient veoir comment on tiroit les metaulx

Page [70v]
ou comment on fondoit l'artillerye: ou alloient veoir les lapidaires, orfevres et tailleurs de pierreries, ou les Alchymistes et monoyeurs, ou les haultelissiers, les tissotiers, les velotiers, les horologiers, miralliers, Imprimeurs, organistes, tinturiers, et aultres telles sortes d'ouvriers, et par tout donnans le vin, aprenoient, et consideroient l'industrie et invention des mestiers.

Alloient ouir les lecons publicques, les actes solennelz, les repetitions, les declamations, les playdoiez des gentilz advocatz, les concions des prescheurs evangeliques.

Passoit par les salles et lieux ordonnez pour l'escrime, et la contre les maistres essayoit de tous bastons, et leurs monstroit par evidence, que autant voyre plus en scavoit que iceulx.

Et au lieu de arboriser, visitoient les bouticques des drogueurs, herbiers et apothecaires, et soigneusement consideroient les fruictz, racines, fueilles, gommes,

Page Fu.71.
semences, axunges, peregrines, ensemble aussi comment on les adulteroit.

Alloit veoir les basteleurs, trejectaires et theriacleurs, et consideroit leurs gestes, leurs ruses, leurs sobressaulx, et beau parler: singulierement de ceulx de Chaunys en Picardie, car ilz sont de nature grands jaseurs et beaulx bailleurs de baillivernes en matiere de cinges verds.

Eulx retournez pour soupper, mangeoient plus sobrement que es aultres jours, et viandes plus desiccatives et extenuantes: affin que l'intemperie humide de l'air, communicque au corps par necessaire confinité, feust par ce moyen corrigee et ne leurs feust incommode par ne soy estre exercitez: comme avoient de coustume.

Ainsi fut gouverné Gargantua et continuoit ce proces de jour en jour, profitant comme entendez que peut faire un jeune homme scelon son aage de bon sens, en tel exercice, ainsi continué. Lequel

Page [71v]
combien que semblast pour le commencement difficile, en la continuation tant doulx fut, legier, et delectable, que mieulx ressembloit un passetemps de roy, que l'estude d'un escholier.

Toutesfoys: Ponocrates pour le sejourner de ceste vehemente intention des esperitz, advisoit une foys le moys quelque jour bien clair et serain, auquel bougeoient au matin de la ville, et alloient ou a Gentily, ou a Boloigne, ou a Montrouge, ou au pont Charanton, ou a Vanves, ou a sainct Clou. Et la passoient toute la journee a faire la plus grande chere dont ilz se pouvoient adviser: raillans gaudissans: beuvans d'aultant: jouans chantans: dansans: se voytrans: en quelque beau pre: deniceans des passereaulx prenans des cailles: peschans aux grenoilles: et escrevisses.

Mais encores que icelle journee feust passee sans livres et lectures: poinct elle n'estoit passee sans proffit. Car en beau pré ilz recoloient par cueur quelques plaisans

Page Fu.72.
vers: de l'agriculture de Virgile : de Hesiode : du Rusticque de Politian : descripvoient quelques plaisans epigrammes en latin: puis le mettoient par rondeaux et ballades en langue Francoyse.

En banquetant du vin aisgue separoient l'eau: comme l'enseigne Cato de re rustica. et Pline : avecques un guobelet de Lyerre: lavoient le vin en plain bassin d'eau: puis le retiroient avec un embut: faisoient aller l'eau d'un verre en aultre: bastisoient plusieurs petitz engins automates: c'est a dire: soy mouvens eulx mesmes.

Real    Hypothetical    Fictional    Mythical   
Region, area    Town, village    Building    Water (lakes, rivers, etc.)    mountains, islands, ...    Other