¶Le teneur des letres que Grandgousier escryvoyt a Gargantua. Chap. xxvii.

La ferveur de tes estudes requeroyt que de long temps ne te revocasse de cestuy philosophicque repous, sy la confiance de nos amys et anciens confederez n’eust de present frustre la seurete de ma viellesse. Mays puis que telle est cette fatale destinee, que par yceulx soye inquiete: es quelz plus je me repousoye, force me est te rappeller au subside

des gens et biens qui te sont par droict naturel affiez. Car ainsi comme debiles sont les armes au dehors, si le conseil n’est en la maison: aussi vaine est l’estude et le conseil inutile: qui en temps oportun par vertus n’est execute et son effect reduict. Ma deliberation n’est poinct de provocquer, mays de apayser, d’assaillir mays defendre: de conquester, mays de guarder mes feaulx subjectz et terres hereditaires. Es quelles est hostilement entre Picrochole, sans cause ny occasion, et de jour en jour porsuyt sa furieuse entreprinse avecques exces non tolerables a persones liberes. Je me suis en debvoir mys pour moderer sa cholere tyrannic que luy offrent tout ce que je pensoys luy povoir estre en contentement, et par plusieurs foys ay envoye amiablement devers luy pour entendre en quoy, par qui, et comment il se sentoyt oultrage, mays de luy n’ay eu responce que de voluntaire deffiance, et que en mes terres pretendoyt seulement droict de bien seance. Dont j’ay congneu que dieu eternel l’a laisse au gouvernail de son franc arbitre et propre sens, qui ne peut estre que meschant sy par grace divine n’est continuellement guyde: et pour le contenir en office et reduyre a congnoissance me l’a ycy envoye a molestes enseignes. Pourtant mon filz bien ame le plus toust que fayre pouras ces letres veues retourne a diligence secourir non tant moy (ce que toutesfoys par pitie naturellement tu doibs) que les tiens, lesquelz par raison tu peuz saulver et guarder. L’exploict sera faict a moindre effusion de sang que sera possible. Et si possible est par engins plus expediens, cauteles et ruzes de guerre nous saulverons toutes les ames: et les envoyerons joyeux a leurs domiciles. Treschier filz la paix de Christ nostre redempteur soyt avecques toy. Salue Ponocrates, Gymnaste, et Eudemon de par moy. Du vingtiesme de Septembre. Ton pere Grandgousier.