¶Comment Picrochole fuiant feut surpris de males fortunes. et ce que feit Gargantua apres la bataille. Chap. xlvii.

Picrochole ainsi desespere s’en fuyt vers l’isle Bouchart, et au chemin de Riviere son cheval bruncha

Page [172]
par terre. A quoy tant feut indigne que de son espee le tua en sa chole. puis ne trouvant personne qui le remontast, voulut prandre un asne du molin qui la aupres estoit/ mais les meusniers le meutrirent tout de coups, et le destrousserent de ses habillemens, et luy baillerent pour soy couvrir une meschante sequenye. Ainsi s’en alla le pauvre cholericque / puis passant l’eau au port Huaux, et racontant ses males fortunes, feut advise par une vieille lourpidon, que son royaulme luy seroit rendu, a la venue des Coquecigrues, depuis ne scayt on qu’il est devenu. Toutesfoys l’on m’a dict qu’il est de present pauvre guaignedenier a Lyon cholere comme davant Et tousjours se guemente a tous estrangiers de la venue des Coquecigrues/ esperant certainement, scelon la prophetie de la vieille, estre a leur venue reintegre en son royaulme. Apres leur retraicte Gargantua premierement recensa ses gens et trouva que peu d’iceulx estoient peryz en la bataille exceptez quelques gens de pied de la bande du capitaine Tolmere / et Ponocrates qui avoit un coup de harquebouze en son pourpoinct. Puis les feist refraischir chascun par sa bande et commanda es threzoriers que ce repas leur feust defraye et paye/ et que l’on ne feist oultraige quelconques en la ville, veu qu’elle estoit sienne/
Page [173]
et que apres leur repas ilz compareussent en la place davant le chasteau, et la seroient payez pour six moys. Ce que feut faict, puis feist convenir davant soy en la dicte place tous ceulx qui la restoient de la part de picrochole, esquelz presens tous ses princes et capitaines parla comme s’ensuyt.

Real    Hypothetical    Fictional    Mythical   
Region, area    Town, village    Building    Water (lakes, rivers, etc.)    mountains, islands, ...    Other