¶Comment Gargantua assaillit Picrochole dedans la Rocheclermaud et defist l’armee dudict Picrochole. Chap. xlvi.

Gargantua eut la charge totalle de l’armee/ son pere demoura en son fort. Et leur donnant couraige par bonnes parolles, promist grandz dons a ceulx qui feroient quelques prouesses. Puis guaignerent le gue de Vede / et par basteaulx et pons legierement faictz passerent oultre d’une traicte. Puis considerant l’assiete de la ville qui estoit en lieu hault et adventageux, delibera celle nuyct sus ce qu’estoit de faire. Mais Gymnaste luy dist Seigneur telle est la nature et complexion des Francoys, que ilz ne valent que a la premiere poincte. Lors ilz sont plus que diables. Mais s’ilz sejournent, ilz sont moins que femmes. Je suys d’advis que a heure presente apres que voz gens auront quelque peu respire et repeu/ faciez donner

Page [169]
l’assault. L’advys feut trouve bon. Adoncques produict toute son armee en plain camp, mettant les subsides du couste de la montee. Le Moyne print avecques soy six enseignes de gens de pied, et deux cens hommes d’armes, et en grande diligence traversa le marays, et guaingna au dessus le puy jusques au grand chemyn de Loudun. Ce pendant l’assault continuoit, les gens de Picrochole ne scavoient si le meilleur estoit sortir hors et les repcevoir, ou bien guarder la ville sans bouger. Mais furieusement sortit avecques quelque bande d’hommes d’armes de sa maison: et la feut receu et festoye a grandz coups de canon qui gresloient devers les cousteaux, dont les Gargantuistez se retirerent au val, pour mieulx donner lieu a l’artillerye. Ceulx de la ville defendoient le mieulx que povoient mays les traictz passoient oultre par dessus sans nul ferir. Aulcuns de la bande saulvez de l’artillerie donnerent fierement sus noz gens/ mais peu profiterent. car tous feurent repceuz entre les ordres, et la ruez par terre. Ce que voyans se vouloient retirer, mais ce pendent le Moyne avoit occupe le passaige. Par quoy se mirent en fuyte sans ordre ny maintien. Aulcuns vouloient leur donner la chasse, mais le Moyne les retint craignant que suyvant les fuyans perdissent leurs rancz, et que sus ce poinct
Page [170]
ceulx de la ville chargeassent suz eulx. Puis attendant quelque espace, et nul ne comparant a l’encontre, envoya le duc Phrontiste pour admonnester Gargantua a ce qu’il avanceast pour guaigner le cousteau a la gauche pour empescher la retraicte de Picrochole par celle porte. Ce que feist Gargantua en toute diligence et y envoya quatre legions de la compaignie de Sebaste, Mais si toust ne peurent gaigner le hault, qu’ilz ne rencontrassent en barbe Picrochole et ceulx qui avecques luy s’estoient espars. Lors chargerent sus roiddement, toutesfois grandement feurent endommaigez par ceulx qui estoient sus les murs en coupz de traict et artillerie. Quoy voyant Gargantua en grande puissance alla les secourir, et commencza son artillerie a hurter sus ce quartier de murailles, tant que toute la force de la ville y fut evocquee. Le moyne voyant celluy couste lequel il tenoit assiege, denue de gens et guardes, magnanimement tyra vers le fort et tant feist qu’il monta sus, luy et aulcuns de ses gens pensant que plus de craincte et de frayeur donnent ceux qui surviennent a un conflict, que ceulx que lors a leur force combattent. Toutesfoys ne feist oncques effroy, jusques a ce que tous les siens eussent guaigne la muraille/ excepte les deux cens hommes d’armes qu’il laissa hors pour les hazars. Puis s’escria horriblement et les siens ensemble,
Page [171]
et sans resistance tuerent les guardes d’icelle porte, et la ouvrirent es hommes d’armes et en toute fierte coururent ensemble vers la porte de L’orient, ou estoit le desarroy. Et par darriere renverserent toute leur force, voyans les assiegez de tous coustez/ et les Gargantuistes avoir guaigne la ville, se rendirent au Moyne a mercy. Le Moyne leurs feist rendre les bastons et armes: et tous retirer et reserrer par les eglises saisissant tous les bastons des croix/ et commettant gens es portes pour les garder de yssir. Puis ouvrant celle porte orientale sortit au secours de Gargantua. Mais Picrochole pensoit que le secours luy venoit de la ville/ et par oultrecuydance se hazarda plus que devant: jusques a ce que Gargantua s’escrya. Frere Jean mon amy/ frere Jean en bon heur soyez venu. Adoncques congnoissent Picrochole et ses gens que tout estoit desespere, prindrent la fuyte en tous endroictz. Gargantua les poursuyvit jusques pres Vaugaudry tuant et massacrant, puis sonna la retraicte.

Real    Hypothetical    Fictional    Mythical   
Region, area    Town, village    Building    Water (lakes, rivers, etc.)    mountains, islands, ...    Other