¶Comment le nom fut impose a Gargantua : et comment il humoyt le piot. Chapitre. vi.

Le bon homme Grant gousier beuvant, et se rigollant avecques les aultres entendit le cris horrible que son filz avoit faict entrant en lumiere de ce monde, quant il brasmoit demandant a boyre/ a boyre/ a boyre/ dont il dist, que grant tu as, supple le gousier. Ce que oyans les assistans, dirent que vrayement il debvoit avoir par ce le nom Gargantua, puis que telle avoyt este la premiere parole de son pere a sa nativite, a l’imitation et exemple des anciens Hebreux. A quoy fut condescendu par ycelluy, et pleut tresbien a sa mere. Et pour l’appaiser, luy donnerent a boyre a tyrelarigot, et feut porte sus les fonts/ et la baptise, comme est la coustume des bons christians. Et luy feurent ordonnees dix et sept mille neuf cens vaches de Pautille, et de Brehemond : pour l’alaicter ordinairement, car de trouver nourrice convenente n’estoyt possible en tout le pais, considere la grande quantite, de laict requis pour ycelluy alimenter. Combien qu’aulcuns docteurs Scotistes ayent afferme que sa mere l’alaicta, et qu’elle pouvoit trayre de ses mammelles quatorze cens pippes de laict pour chascune fois. Ce que n’est vray semblable. Et a este la proposition declaree par Sorbone scandaleuse, et

des pitoyables aureilles offensive, et sentant de loing heresie. En cest estat passa jusques a un an et dix moys, en quel temps par le conseil des medicins on commencza le porter, et fut faicte une belle charrette a boeufz par l’invention de Jean denyau, et la dedans on le pourmenoit par cy/ par la, joyeusement et le faisoyt bon veoir car il portoit bonne troigne, et avoyt presque dix et huyt mentons: et ne crioyt que bien peu, mais il se conchioyt a toutes heures, car il estoit merveilleusement phlegmaticque des fesses, tant de sa complexion naturelle, que de la disposition accidentale qui luy estoit advenue par trop humer de puree Septembrale. Et n’en humoyt poinct sans cause. Car s’il advenoyt qu’il feust despit, courrousse, fache, ou marry, s’il trepignoyt/ s’il pleuroyt, s’il crioyt, luy aportant a boyre, l’on le remettoyt en nature, et soubdain demouroyt quoy et joyeux. Une de ses gouvernantes m’a dict, que de ce fayre il estoyt tant coustumier, qu’au seul son des pinthes et flaccons, il entroyt en ecstase, comme s’il goustoyt les joyes de paradis. En sorte qu’elles considerant ceste complexion divine pour le resjouyr au matin faisoyent davant luy sonner des verres avecques un cousteau, ou des flaccons avecques leur toupon, ou des pinthes avecques leur couvercle. Auquel son il s’esguayoit, il tressailloit, et luy mesmes se bressoit en dodelinant de la teste, monichordisant des doigtz, et baritonant du cul.