De l'adolescence de Gargantua. Chapitre. xj.

Gargantua depuis les troys jusques a cinq ans feut nourry et institué en toute discipline convenente par le commandement de son pere, et celluy temps passa comme les petitz enfans du pays, c'est assavoir a boyre, manger, et dormir: a manger, dormir, et boyre: a dormir, boyre, et manger.

Tousjours se vaultroit par les fanges, se mascaroyt le nez, se chauffourroit le visaige. Aculoyt ses souliers, baisloit souvent au mousches, et couroit voulentiers aprés les parpaillons, desquelz son pere tenoit l'empire. Il pissoit sus ses souliers, il chyoit en sa chemise, il se mouschoyt a ses manches, il mourvoit dedans sa soupe. Et patroilloit par tout lieux, et beuvoit en sa pantoufle, et se frottoit ordinairement le ventre d'un panier. Ses dens aguysoit d'un sabot, ses mains lavoit de potaige, se pignoit d'un goube

let. Se asseoyt entre deus selles le cul a terre. Se couvroyt d'un sac mouillé. Beuvoyt en mangeant sa souppe. Mangeoyt sa fouace sans pain. Mordoyt en riant. Rioyt en mordent. Souvent crachoyt on bassin, pettoy de gresse. pissoyt contre le soleil. Se cachoyt en l'eau pour la pluye. Battoyt a froid. Songeoyt creux. faisoyt le succre. Escorchoyt le renard. disoit la patenostre du cinge. retournoit a ses moutons. Tournoyt les truies au foin. Battoyt le chien devant le lion. Mettoyt la charrette devant les beufz. se grattoyt ou ne luy demangeoyt poinct. Tiroit les vers du nez. Trop embrassoyt, et peu estraignoyt. Mangeoyt son pain blanc le premier. ferroyt les cigalles. Se chatouilloyt pour se faire rire. ruoyt tresbien en cuisine. faisoyt gerbe de feurre au dieux. faisoyt chanter magnificat a matines, et le trouvoyt bien a propous. Mangeoyt chous et chioyt pourree. congnoissoyt mousches en laict. faisoyt perdre les pieds au mousches. Ratissoyt le papier. chaffourroyt le parchemin. Guaignoyt au pied. Tiroyt au chevrotin. Comptoyt sans son houste. Battoyt les buissons, sans prandre les ozillons. Croioyt que nues feussent pailles d'arain, et que vessies feussent lanternes. Tiroyt d'un sac deux monstures. Faisoyt de l'asne pour avoir du bren. De son poing faisoyt un maillet. Prenoit les grues du premier sault. Vouloyt que maille a maille on feist les haubergeons. De cheval donné tousjours reguardoyt en la gueulle. Saultoyt du coq a l'asne. Mettoyt entre deux verdes une meure. faisoyt de la terre le fousse. Gardoyt la lune des loups. Si les nues tomboient esperoyt prandre les alouettes. Faisoyt de necessite vertus. Faisoyt de tel pain souppe. Se soucioyt aussi peu des raitz comme des tonduz. Tous les matins escorchoyt le renard. Les petitz chiens de son pere mangeoient en son escuelle. Luy de mesmes mangeoit avecques eux: il leurs mordoit les aureilles. Ilz luy graphinoient le nez. Il leurs souffloit au cul. Ilz luy leschoient les badigoinces.

Et sabez quey hillotz, que mau de pipe vous byre, ce petit paillard tousjours tastonoit ses gouvernantes cen dessus dessoubz, cen devant derriere, harry bourriquet: et desja commencoyt exercer sa braguette. Laquelle un chascun jour ses gouvernantes ornoyent de beaulx boucquets, de beaulx rubans, de belles fleurs, de beaulx flocquars: et passoient leur temps a la faire revenir entre leurs mains, comme un magdaleon d'entraict. Puis s'esclaffoient de rire quand elle levoit les aureilles, comme si le jeu leurs eust pleu.

L'une la nommoit ma petite dille, l'autre ma pine, l'aultre ma branche de coural, l'autre mon bondon, mon bouchon, mon vibrequin, mon possouer, ma teriere, ma pendilloche, mon rude esbat roidde et bas, mon dressouoir, ma petite andoille vermeille, ma petite couille bredouille Elle est a moy disoit l'une. C'est la mienne, disoit l'aultre. Moy, (disoit

l'aultre) n'y auray je rien? par ma foy je la couperay doncques. Ha couper, (disoit l'aultre) vous luy feriez mal ma dame, coupez vous la chose aux enfans, il seroyt monsieur sans queue.

Et pour s'esbatre comme les petitz enfans du pays luy feirent un beau virollet des aesles d'un moulin a vent de Myrebalays.