La conclusion du present livre, et l'excuse de l'auteur. Chapitre. xxxiiij.

Or messieurs vous avez ouy un commencement de l'histoire horrificque de mon maistre et seigneur Pantagruel Icy je feray fin a ce premier livre: la teste me faict un peu de mal et sens bien que les registres de mon cerveau sont quelque peu brouillez de ceste puree de Septembre. Vous aurez la reste de l'histoire a ces foires de Francfort prochainement venantes, et la vous verrez comment Panurge fut marié, et cocqu des le premier moys de ses nopces et comment Pantagruel trouva la pierre philosophale, et la maniere de la trouver et d'en user. Et comment il passa les

mons Caspies, comment il naviga par la mer Athlanticque et deffit les Caniballes, et conquesta les isles de Perlas. Comment il espousa la fille du roy de Inde nommée Presthan. Comment il combatit contre les diables, et fist brusler cinq chambres d'enfer, et mist a sac la grande chambre noire, et getta Proserpine au feu, et rompit quatre dentz a Lucifer, et une corne au cul, et comment il visita les regions de la lune, pour scavoir si a la verite la Lune n'estoit entiere: mais que les femmes en avoient troys quartiers en la teste Et mille aultres petites joyeusetez toutes veritables. Ce sont belles besoignes. Bon soir messieurs. Pardonnante my, et ne pensez tant a mes faultes, que ne pensez bien es vostres.Si vous me dictes. Maistre, il sembleroit que ne feussiez grandement saige de nous escrire ces balivernes et plaisantes mocquettes.

Je vous responds, que vous ne l'estes gueres plus, de vous amuser a les lire. Toutesfoys sy pour passetemps joyeulx

les lisez, comme passant temps les escripvoys, vous et moy sommes plus dignes de pardon q'un grand tas de Sarrabovittes, Cagotz, Escargotz, Hypocrites, Caffars, Frapars, Botineurs et aultres telles sectes de gens, qui se sont desguizez comme masques pour tromper le monde.

Car donnans entendre au populaire commun, qu'ilz ne sont occupez sinon a contemplation et devotion, en jeusnes et ma ceration de la sensualite: sinon vrayement pour sustenter et alimenter la petite fragilite de leur humanite: au contraire font chiere dieu scait quelle, et Curios simulant, sed Bacchanalia vivunt . Vous le pouvez lire en grosse lettre et enlumineure de leurs rouges muzeaulx, et ventres a poulaine, sinon quand ilz se parfument de Soulphre.Quant est de leur estude, elle est toute consummee a la lecture de livres Pantagruelicques: non tant pour passer temps joyeusement, que pour nuyre a quelc'un meschantement, scavoir est, articulant, monorticulant, torticulant,

culletant, couilletant, et diabliculant, c'est a dire callumniant.Ce que faisans semblent es coquins de village qui fougent et escharbottent la merde des petitz enfans en la saison des cerises et guignes, pour trouver les noyaulx, et iceulx vendre es drogueurs qui font l'huille de Maguelet. Iceulx fuyez abhorrissez, et haissez autant que je foys et vous en trouverez bien sur ma foy. Et si desirez estre bons pantagruelistes (c'est a dire vivre en paix, joye, santé, faisans tousjours grand chere) ne vous fiez jamais en gens qui regardent par un partuys.

Fin des Cronicques de Pantagruel, Roy des Dipsodes restituez a leur naturel, avec ses faictz et prouesses espoventables: composez par feu M. Alcofribas abstracteur de quinte essence.