Des quatre saisons de l'année. Et premierement du printemps. Cha. vii.

En toute ceste année ne sera q'une Lune, encores ne sera elle poinct nouvelle, vous en estes bien marriz vous aultres qui ne croyez mie en dieu, qui persecutez sa saincte et divine parolle, ensemble ceulx qui la maintiennent. Mais allez vous pendre, ja ne sera aultre lune que celle laquelle dieu crea au commencement du monde, et laquelle par l'effect de sadicte sacre parolle a

Page [145v]
esté establie au firmament pour luyre et guider les humains de nuyct. Ma Dia je ne veulx par ce inferer qu'elle ne monstre a la terre et gens terrestres diminution, ou accroissement de sa clarté, selon qu'elle approchera ou s'esloignera du Soleil. Car, Pourquoy? Pour autant que etc. Et plus pour elle ne priez que dieu la garde des loups car ilz ne y toucheront de cest an. Je vous affie. A propos: vous verrez ceste saison a moytié plus de fleurs, qu'en toutes les troys aultres. Et ne sera reputé fol cil qui en ce temps fera sa provision d'argent mieulx que de Aranes toute l'année. Les gryphons et marrons des montaignes de Savoye, Daulphiné, et hyperborées qui ont neiges sempiternelles, seront frustrez de ceste saison, et n'en auront poinct, selon l'opinion de Avicenne qui dict que le printemps est lors que les neiges tombent des monts. Croyez ce porteur. De mon temps l'on contoyt Ver, quand le Soleil entroyt on premier degre de
Page [146]
Aries. Si maintenant on le compte autrement, je passe condemnation. Et jou mot.

Réel    Hypothétique    Fictif    Mythique   
Région, contrée    Ville, village    Bâtiment    Étendue, cours d'eau    Montagne, île, ...    Autre