Page Fu.86.

Comment Panurge feut amoureux d'une haulte dame de Parisdame de ParisParis. Chapitre. xxj.

Panurge commenca estre en reputation en la ville de Paris par ceste disputation que il obtint contre l'Angloys, et faisoit des lors bien valoir sa braguette, et la feist au dessus esmoucheter de broderie a la Romanicque. Et le monde le louoit publicquement, et en feust faicte une Chanson, dont les petitz enfans alloyent a la moustarde, et estoit bien venu en toutes compaignies des dames et damoiselles, en sorte qu'il

Page [86v]
devint glorieux, si bien qu'il entreprint venir au dessus d'une des grandes dames de la ville.De faict laissant un tas de longs prologues et protestations que font ordinairement ces dolens contemplatifz amoureux de Karesme, lesquelz poinct a la chair ne touchent, luy dict un jour.Ma dame, ce seroit bien fort utile a toute la republicque, delectable a vous, honneste a vostre lignee, et a moy necessaire, que feussiez couverte de ma race, et le croyez, car l'experience vous le demonstrera.La dame a ceste parolle le reculla plus de cent lieues, disant. Meschant fol vous appertient il me tenir telz propos? A qui pensez vous parler? allez, ne vous trouvez jamais devant moy, car si n'estoit pour un petit, je vous feroys coupper bras et jambes.Or (dist il) ce me seroit bien tout un d'avoir bras et jambes couppez, en condition que nous fissions vous et moy un transon de chere lie, jouans des manequins a basses marches: car
Page Fu.87.
(monstrant sa longue braguette) voicy maistre Jean Jeudy : qui vous sonneroit une antiquaille, dont vous sentirez jusques a la moelle des os.Il est galland et vous scait tant bien trouver les alibitz forains et petitz poullains grenez en la ratouere, que apres luy n'y a que espousseter.A quoy respondit la dame. Allez meschant allez, si vous me dictes encores un mot, je appelleray le monde: et vous feray icy assommer de coups. Ho (dist il) vous n'estez tant male que vous dictez, non ou je suis bien trompé a vostre physionomie: car plus tost la terre monteroit es cieulx et les haulx cieulx descendroyent en l'abisme et tout ordre de nature seroyt parverty: qu'en si grande beaulte et elegance comme la vostre, y eust une goutte de fiel, ny de malice. L'on dict bien que a grand peine veit on jamais femme belle, qui aussi ne feust rebelle: mais cella est dict de ces beaultez vulgaires. La vostre est tant excellente, tant singuliere: tant celeste,
Page [87v]
que je croy que nature l'a mise en vous comme un parragon pour nous donner entendre combien elle peut faire quand elle veult employer toute sa puissance et tout son scavoir.Ce n'est que miel, ce n'est que sucre, ce n'est que manne celeste, de tout ce qu'est en vous. C'estoit a vous a qui Paris debvoit adjuger la pomme d'or non a Venus non, ny a Juno, ny a Minerve : car oncques n'y eut tant de magnificence en Juno, tant de prudence en Minerve, tant de elegance en Venus, comme y a en vous. O dieux et deesses celestes, que heureux sera celluy a qui ferez celle grace de ceste cy accoller, de la baiser et de frotter son lart avecques elle. Par dieu ce sera moy, je le voy bien, car desja elle me ayme tout a plein, je le congnoys, et suis a ce predestine des phees. Doncques pour gaigner temps boutte poussenjambions. Et la vouloit embrasser, mais elle fist semblant de se mettre a la fenestre pour appeller les voisins a la force. Adoncques
Page Fu.88.
sortit Panurge bien tost, et luy dist en fuyant.Ma dame attendez moy icy, je les voys querir moy mesme, n'en prenez la poine.Ainsi s'en alla, sans grandement se soucier du reffus qu'il avoit eu, et n'en fist oncques pire chiere.

Au lendemain il se trouva a l'eglise a l'heure qu'elle alloit a la messe. a l'entree luy bailla de l'eau beniste se enclinant parfondement devant elle, apres se agenouilla aupres de elle familiairement, et luy dist.Ma dame saichez que je suis tant amoureux de vous, que je n'en peuz ny pisser ny fianter, je ne scay comment l'entendez. S'il m'en advenoit quelque mal, que en seroit il?Allez (dist elle) allez, je ne m'en soucie: laissez moy icy prier dieu.Mais (dist il) equivocquez sur A beau mont le viconte. Je ne scauroys, dist elle. C'est (dist il) a beau con le vit monte. Et sur cella priez dieu qu'il me doint ce que vostre noble cueur desire, et me donnez ces patenostres par grace. Tenez (dist elle) et ne me tabustez

Page [88v]
plus. Ce dict, luy vouloit tirer ses patenostres que estoyent de cestrin avecques grosses marques d'or, mais Panurge promptement tira un de ses cousteaux, et les couppa tresbien et les emporta a la fryperie, luy disant, voulez vous mon cousteau? Non non, dist elle. Mais (dist il) a propos, il est bien a vostre commendement corps et biens, tripes et boyaulx.

Ce pendent la dame n'estoit fort contente de ses patenostres: car c'estoit une de ses contenences a l'eglise. Et pensoit ce bon bavart icy est quelque esvente, homme d'estrange pays, je ne recouvreray jamais mes patenostres, que m'en dira mon mary? Il se courroucera a moy: mais je luy diray que un larron me les a couppées dedans l'eglise, ce que il croira facillement, voyant encores le bout du ruban a ma ceincture.Apres disner Panurge l'alla veoir portant en sa manche une grande bourse pleine d'escuz du palais et de gettons, et luy commenca dire,Lequel des deux aymez

Page Fu.89.
plus l'aultre ou vous moy, ou moy vous? A quoy elle respondit. Quant est de moy je ne vous hays poinct: car comme dieu le commande: je ayme tout le monde.

Mais a propos (dist il) n'estez vous amoureuse de moy? Je vous ay (dist elle) ja dict tant de foys que vous ne me tenissiez plus telles parolles, si vous m'en parlez encores je vous monstreray que ce n'est a moy a qui vous debvez ainsi parler de deshonneur, Partez d'icy, et me rendez mes patenostres, a ce que mon mary ne me les demande.Comment (dist il) ma dame voz patenostres? non feray par mon sergent, mais je vous en veux bien donner d'aultres, en aymerez vous mieulx d'or bien esmaillé en forme de grosses spheres, ou de beaulx lacz d'amours, ou bien toutes massifves comme gros lingotz, ou si en voulez de Ebene, ou de gros Hyacinthes, de gros grenatz taillez avecques les marches de fines Turquoyses, ou de beaulx Topazes marchez de fins Saphiz ou de

Page [89v]
beaulx Balays a tout grosses marches de Dyamans a vingt et huyt quarres, Non non, c'est trop peu. J'en scay un beau chapellet de fines Esmerauldes marchees de Ambre gris, coscoté et a la boucle un Union Persicque gros comme une pomme d'orange: elles ne coustent que vingt et cinq mille ducatz, je vous en veulx faire un present: car j'en ay du content. Et de ce disoit faisant sonner ses gettons comme si se feussent escutz au soleil.Voules vous une piece de veloux violet cramoysi tainct en grene, une piece de satin broché ou bien cramoysi. Voulez vous chaisnes, doreures templettes, bagues? il ne fault que dire ouy. Jusques a cinquante mille ducatz, ce ne m'est rien cela.Par la vertus desquelles parolles il luy faisoit venir l'eau a la bouche. Mais elle luy dict. Non, je vous remercie: je ne veulx rien de vous.Par dieu (dist il) si veulx bien moy de vous: mais c'est chose qui ne vous coustera rien, et n'en aurez rien
Page Fu.90.
moins, tenez, (monstrant sa longue braguette) voicy maistre Jan Chouart qui demande logis, et apres la vouloit accoller, Mais elle commenca a s'escrier, toutesfoys non trop hault.Adoncques Panurge tourna son faulx visaige, et luy dist. Vous ne voulez doncques aultrement me laisser un peu faire? Bren pour vous. Il ne vous appartient tant de bien ny de honneur: mais par Dieu je vous feray chevaucher aux chiens: et se dict s'en fouit le grand pas de peur des coups: lesquelz il craignoit naturellement.

Réel    Hypothétique    Fictif    Mythique   
Région, contrée    Ville, village    Bâtiment    Étendue, cours d'eau    Montagne, île, ...    Autre