Comment Gargantua demollit le chasteau du Gue de Vedechasteau du Gue de VedeGue de VedeVede, et comment ilz passerent le Gue. Chap. xxxvj.

Venu que fut raconta l'estat on quel avoit trouve les ennemys et du Stratageme qu'il avoit

faict, luy seul contre toute leur caterve afferment que ilz n'estoient que maraulx, pilleurs et brigans, ignorans de toute discipline militaire, et que hardiment ilz se missent en voye, car il leurs seroit tresfacile de les assommer comme bestes.

Adoncques monta Gargantua sus sa grande jument, accompaigne comme davant avons dict. Et trouvant en son chemin un hault et grand arbre, (lequel communement on nommoit l'arbre de sainct Martin, pource qu'ainsi estoit creu un bourdon que jadis sainct Martin y planta) dist. Voicy ce qu'il me failloit. Cest arbre me servira de bourdon et de lance. Et l'arrachit facillement de terre et en ousta les rameaux, et le para pour son plaisir. Ce pendent sa jument pissa pour se lascher le ventre: mais ce fut en telle abondance: qu'elle en feist sept lieues de deluge, et deriva tout le pissat au gué de Vedegué de VedeVede et tant l'enfla devers le fil de l'eau, que toute ceste bande des ennemys furent en grand

horreur noyez, exceptez aulcuns qui avoient prins le chemin vers les cousteaux a gauche. Gargantua venu a l'endroit du boys de Vedeboys de VedeVede feut advise par Eudemon que dedans le chasteau estoit quelque reste des ennemys, pour laquelle chose scavoir Gargantua s'escria tant qu'il peut. Estez vous la, ou n'y estez pas? Si vous y estez, n'y soyez plus: si n'y estez: je n'ay que dire. Mais un ribauld canonnier qui estoit au machicoulys: luy tyra un coup de canon, et le attainct par la temple dextre furieusement: toutesfoys ne luy feist pource mal en plus que s'il luy eust gette une prune. Qu'est ce la? dist Gargantua, nous gettez vous icy des grains de raisins? La vendange vous coustera cher. pensant de vray que le boulet feust un grain de raisin. Ceulx qui estoient dedans le chasteau amuzez a la pille en tendant le bruit coururent aux tours, et forteresses, et luy tirerent plus de neuf mille vingt et cinq coups de faulconneaux, et arquebouzes, visans tous a sa teste: et si menu tiroient contre luy, qu'il s'escria. Ponocrates mon amy ces mousches icy me aveuglent, baillez moy quelque rameau de ses saulles pour les chasser. Pensant des plombees et pierres d'artillerie que feussent mousches bovines. Ponocrates l'advisa que n'estoient aultres mousches que les coups d'artillerye que l'on tiroit du chasteau. Alors chocqua de son grand arbre contre le chasteau, et a grans coups abastit et tours, et forteresses, et ruyna tout par terre. Par ce moyen feurent tous rompuz, et mis en pieces ceulx qui estoient en icelluy. De la partans arriverent au pont du moulin, et trouverent tout le gue couvert de corps mors, en telle foulle qu'ilz avoient enguorge le cours du moulin, et c'estoient ceulx qui estoient peritz au deluge urinal de la jument. La feurent en pensement comment ilz pourroient passer, veu l'empeschement de ces cadavres. Mais Gymnaste dist. Si les diables y ont passe, je y passeray fort bien. Les diables (dist Eudemon) y ont passe pour en emporter les ames damnees: sainct Treignan (dist Ponocrates) par doncques consequence necessaire il y passera. Voyre, voyre dist Gymnaste, ou je demoureray en chemin. Et donnant des esperons a son cheval passa franchement oultre, sans que jamais son cheval eust fraieur des corps mors. Car il l'avoit acoustume (selon la doctrine de Aelian) a ne craindre les ames ny corps mors. Non en tuant les gens, comme Diomedes tuoyt les Traces, et Ulysses mettoit les corps de ses ennemys es pieds de ses chevaulx, ainsi que raconte Homere : mais en luy mettant un phantosme parmy son foin, et le faisant ordinairement passer sus icelluy quand il luy bailloit son avoyne. Les troys aultres le suyvirent sans faillir, excepte Eudemon, duquel le cheval enfoncea le pied droict jusques au genoil dedans la pance d'un gros et gras villain qui estoit la noye a l'envers, et ne le povoit tirer hors: ainsi demoureroit empestré, jusques a ce que Gargantua du bout de son baston enfondra le reste des tripes du villain en l'eau, ce pendent que le cheval levoit le pied. Et (qui est chose merveilleuse en hippiatrie) feut ledict cheval guery d'un surot qu'il avoit en celluy pied, par l'atouchement des boyaux de ces gros marroufles.