Comment Panurge prent conseil de frere Jan des Entommeures Chapitre XXVI.

Panurge estoit fasché des propous de Her Trippa, et avoir passé la bourgade de Huymes, s’addressa a frere Jan, et luy dist becguetant, et soy gratant l’aureille guausche. Tien moy un peu joyeulx mon bedon. Je me sens tout matagrabolisé en mon esprit, des propous de ce fol endiablé. Escoute couillon mignon.

Couillon moignon. c de renom. c. paté. c. naté. c. plombé. c. laicté. c. feutré. c. calfaté. c. madré c. relevé. c. de stuc. c. de crotesque . c. Arabesque. c. asseré. c. troussé la levresque. c. antiquaire. c. asceuré c. guarancé. c. calandré. c. requamé. c. diapré c. estamé. c. martelé. c. entrelardé. c. juré. c. bourgeois. c. grené. c. d’esmorche. c. endesvé. c. goildronné. c. palletoqué. c. aposté. c. lyripipié. c. desiré. c. vernissé. c. d’Ebene. c. de Bresil. c. de Bouys. c. organizé. c. Latin. c. de passe. c. a croc. c. d’estoc. c. effrené. c. forcené. c. affecté. c. entassé. c. compassé. c. farcy. c. bouffy. c. polly. c. jolly. c. poudrebif. c. brandif. C. positif. c. gerondif. c. genitif. c. actif. c. gigantal. c. vital. c. oval. c. magistral. c. claustral. c. monachal. c. viril. c. subtil. c. de respect. c. de relés. c. de sejour. c. d’audace. c. massif. c. lascif. c. manuel. c. guoulu. c. absolu. c. resolu. c. membru. c. cabus. c. gemeau. c. courtoys. c. turquoys c. fecond. c. brislant. c. sifflant. c. estrillant. c. gent. c. urgent. c. banier. c. duisant. c. brusquet. c. prompt. c. prinsaultier. c. fortuné. c. clabault. c. coyrault. c. usual. c. de haulte lisse. c. exquis. c. requis. c. fallot. c. cullot. c. picardent. c. de raphe. c. Guelphe. c. Ursin. c. de triage. c. de paraige. c. de mesnage. c. patronymicque. c. pouppin. c. guespin. c. d’alidada. c. d’algamala. c. d’algebra. c. robuste. c. venuste. c. d’appetit. c. insuperable. c. secourable. c. agreable. c. redoubtable. c. espovantable. c. affable. c. profitable. c. memorable. c. notable. c. palpable. c. musculeux. c. bardable. c. subsidiaire. c. Tragicque. c. Satyricque. c. transpontin. c. repercussif. c. digestif. c. convulsif. c. incarnatif. c. restauratif. c. sigillatif. c. masculinant. c. ronssinant. c. baudouinant. c. refaict. c. fulminant. c. tonnant. c. estincelant. c. martelant. c. arietant. c. strident. c. aromatisant. c. timpant. c. diaspermatisant. c. pimpant. c. ronflant. c. paillard. c. pillard. c. guaillard. c. hochant. c. brochant. c. talochant. c. avorté. c. eschalloté. c. syndicqué. c. farfouillant. c. belutant. c. culbutant. Couillon hacquebutant, couillon culletant frere Jan mon amy, je te porte reverence bien grande. et te reservoys a bonne bouche: je te prie diz moy ton advis. Me doibs je marier ou non? Frere Jan luy respondit en alaigresse d’esprit, disant. Marie toy de par le Diable, marie toy, et carrillonne a doubles carrillons de couillons. Je diz et entends le plus toust que faire pourras. Des huy au soir faiz en crier les bancs et le challit. Vertus Dieu a quand te veulx tu reserver? Sçaiz tu pas bien, que la fin du monde approche? Nous en sommes huy plus pres de deux trabutz et demie toise, que n’estions avant hier. L’Antichrist est desja né. ce m’a lon dict. Vray est que il ne faict encores que esgratigner sa nourrisse et ses gouvernantes: et ne monstre encores les thesaurs. Car il est encores petit. Crescite. Nos qui vivimus. Multiplicamini. il est escript. C’est matiere de breviaire. Tant que le sac de bled ne vaille trois patacz, et le bussart de vin, que six blancs. Vouldrois tu bien qu’on te trouvast les couilles pleines au jugement? dum venerit iudicare. Tu as (dist Panurge) l’esprit moult limpide et serain, frere Jan couillon Metropolitain, et parlez pertinemment. C’est ce dont Leander de Abyde en Asie, nageant par la mer Hellesponte pour visiter s’amie Hero de Seste en Europe, prioit Neptune et tous les Dieux marins.

Si en allant je suys de vous choyé,
Peu au retour me chault d’estre noyé.

Il ne vouloit poinct mourir les couilles pleines. Et suys d’advis que dorenavant en tout mon Salmigondinoys, quand on vouldra par justice executer quelque malfaicteur, un jour ou deux davant on le face brisgoutter en Onocrotale, si bien que en tous ses vases spermaticques ne reste de quoy protraire un Y Gregoys. Chose si precieuse ne doibt estre follement perdue. Par adventure engendrera il un home. Ainsi mourra il sans regret, laissant home pour home.