¶Comment estoient reiglez les Thelemites a leur maniere de vivre. Cha. lv.

Toute leur vie estoit employee non par loix, statutz ou reigles/ mais scelon leur vouloir et franc

arbitre. Se levoient du lict quand bon leur sembloit: beuvoient/ mangeoient/ travailloient / dormoient quand le desir leurs venoit. Nul ne les esveilloit/ nul ne les parforceoyt ny a boyre/ ny a manger/ ny a faire chose aultre quelconques. Ainsi l’avoit estably Gargantua. En leur reigle n’estoit que ceste clause. Faictz ce que vouldras. Par ce que gents liberes/ bien nez/ et bien instruictz, conversans en compaignies honestes ont par nature un instinct et aguillon: qui tousjours les pousse a faictz vertueux, et retire de vice: lequel ilz nommoient honneur. Iceulx quand par vile subjection et contraincte sont deprimez et asserviz: detournent la noble affection par laquelle a vertuz franchement tendoient, a deposer et enfraindre ce joug de servitude. Car nous entreprenons tousjours choses defendues: et couvoytons ce que nous est denie. Par ceste liberte entrerent en louable emulation de faire tous, ce que a un seul voyoient plaire. Si quelq’un ou quelq’une disoyt, Beuvons, tous beuvoient. Si disoit, jouons tous jouoient. Si disoit, allons a l’esbat es champs, tous y alloyent. Si c’estoit pour voller ou chasser/ les dames montees suz belles hacquenees avecques leur palefroy guorrier, sus le poing mignonnement enguantele portoient chascune, ou un esparvier / ou un laneret/ ou un esmerillon: les hommes portoient les aultres oyzeaux Tant noblement estoient aprins qu’il n’estoyt entre eulx celluy ny celle qui ne sceust lire/ escripre/ chanter/ jouer d’instrumens harmonieux/ parler de cinq et six languaiges, et en icelles composer tant en carme que en oraison solue. Jamais ne feurent veuz chevaliers tant preux/ tant gualans, tant dextres et a pied et a cheval, plus vers, mieulx remuans, mieulx manians tous bastons, que la estoient. Jamais ne feurent veues dames tant propres, tant mignonnes, moins fascheuses, plus doctes a la main/ a l’agueille/ a tout acte muliebre honeste et libere, que la estoient. Par ceste raison quand le temps venu estoit que aulcun d’icelle abbaye, ou a la requeste de ses parens, ou pour aultres causes voulust issir hors, avecques soy il emmenoyt une des dames celle laquelle l’auroit prins pour son devot: et estoient ensemble mariez. Et si bien avoient vescu a Theleme en devotion et amitye: encores mieulx la continuoient ilz en mariage et autant se entreaymoient ilz a la fin de leurs jours, comme le premier de leurs nopces. Je ne veulx oublier vous descripre un enigme qui feut trouve on fondemens de l’abbaye en une grande lame de bronze. Tel estoyt comme s’ensuyt.