¶Comment estoient vestuz les religieux et religieuses de theleme. Cha. liiii.

Les dames au commencement de la fondation se habilloient a leur plaisir et arbitre. Depuis feurent reformeez en la faczon que s’ensuyt. Elles portoient chausses d’escarlatte/ ou de migraine, et passoient lesdictes chausses le genoul au dessus par troys doigtz justement. Et ceste liziere estoit de quelques belles broderies et descoupeures. Les jartieres estoient de la couleur de leurs bracelletz, et comprenoient le genoul au dessus et dessoubz. Les souliers, escarpins, et pantofles de velous cramoyzi rouge ou violet, deschicquettez a barbe d’escrevisse. Au dessus de la chemise vestoient la belle vasquine de quelque beau camelot de soye. Sus ycelle vestoient la verdugalle de tafetas blanc/ rouge/ tanne/ grys etc. Au dessus la

cotte de tafetas d’argent faict a broderies de fin or et a l’agueille entortille/ ou scelon que bon leur sembloit et correspondent a la disposition de l’air, de satin/ damas/ velous/ orange/ tanne/ verd/ cendre/ bleu/ tanne clair/ rouge cramoyzi/ blanc, drap d’or/ toille d’argent/ de canetille/ de brodure scelon les festes. Les robbes scelon la saison, de toille d’or a frizure d’argent. de satin rouge couvert de canetille d’or/ de tafetas blanc/ bleu, noir, tanne, sarge de soye, camelot de soye, velous, drap d’argent, toille d’argent, or traict, velous ou satin prophile d’or en diverses protraictures. En este quelques jours en lieu de robbes portoient belles marlottes des parures susdictes, ou quelques bernes a la Moresque de velous violet a frizure d’or sus canetille d’argent ou a courdelieres d’or guarnies aux rencontres de petites perles Indicques. En hyver robbes de tafetas des couleurs come dessus: fourrees de loups cerviers, genettes noyres, martres de calabre et zibelines, et aultres fourrures precieuses. Les patenostres, anneaulx, jazerans car cans estoient de fines pierreries, escarboucles / rubys, balays, diamans, sapphiz, esmeraudes, turquoyzes, grenatz, agathes berilles perles et unions d’excellence. L’acoustrement de la teste estoit selon le temps. En l’hyver a la mode francoyse. Au printemps a L’espagnole. En este a la Tusque. Exceptez les festes et dimanches, esquelz portoient acoustrement Francoys. Par ce qu’il est plus honorable, et mieulx sent la pudicite matronale. Les hommes estoient habillez a leur mode, chausses pour le bas d’estamet ou serge drapee d’escarlatte, de migraine, blanc ou noir. Les hault de velous d’icelles couleurs ou bien pres aprochantes: brodees et deschicquettees scelon leur invention. Le pourpoinct de drap d’or/ d’argent/ de velous/ satin/ damas / tafetas de mesmes couleurs, deschicquettes / broudez, et acoustrez en paragon. Les agueillettes de soye de mesmes couleurs, les fers d’or bien esmaillez. Les sayez et chamarres de drap d’or/ toille d’or/ drap d’argent/ velous porfile a plaisir. Les robbes autant precieuses come des dames. Les ceinctures de soye des couleurs du pourpoinct. chascun la belle espee au couste, la poignee doree, le fourreau de velous de la couleur des chausses. le bout d’or/ et de orfevrerie. Le poignart de mesmes. Le bonnet de velous, noir garny de force bagues et boutons d’or. La plume blanche par dessus mignonnement partie a paillettes d’or, au bout desquelles pendoient en papillettes beaux rubyz, esmeraudes etc. Mais telle sympathie estoit entre les hommes et les femmes: que par chascun jour ilz estoient vestuz de semblable parure. Et pour a ce ne faillir estoient certains gentilz hommes ordonnez pour dire es hommes par chascun matin, quelle livree les dames vouloient en ycelle journee porter. Car le tout estoit faict scelon l’arbitre des dames. En ces vestemens tant propres et acoustremens tant riches ne pensez que eulx ny elles perdissent temps aulcun, car les maistres des garderobbes avoient toute la vesture tant preste par chascun matin: et les dames de chambre tant bien estoient aprinses, que en un moment elles estoient prestez et habilleez de pied en cap. Et pour iceulx acoustremens avoir en meilleur oportunite. Au tour du boys de Thelemeboys de ThelemeTheleme estoit un grand corps de maison long de demye lieue, bien clair et assortye, en laquelle demouroient les orfevres, lapidaires, brodeurs, tailleurs, tyreurs d’or, veloutiers, tapissiers, et aultelissiers / et la oeuvroient chascun de son mestier, et le tout pour les susdictz religieux et religieuses. Iceulx estoient fourniz de matiere et estoffe par les mains du seigneur nausiclete lequel par chascun an leurs rendoyt sept navires des Isles de Perlas et Canibales, chargees de lingotz d’or/ de soye crue/ de perles et pierreries. Si quelques unions tendoient a vetuste, et changeoient de naifve blancheur: icelles par leur art renouvelloient en les donnant a manger a quelques beaux cocqs, comme on baille cure es faulcons.