¶Comment estoit le manoir des Thelemites. Chap. liii.

Au milieu de la basse court estoyt une fontaine magnificque de bel Alabastre. Au dessus les troys Graces avecques cornes d’abondance. Et gettoient l’eau par les mamelles / bouche/ aureilles/ yeulx/ et aultres ouvertures du corps. Le dedans du logis sus ladicte basse court estoit sus gros pilliers de Cassidoine et Porphyre, a beaux ars d’antique. Au dedans des quelz estoient belles gualeries longues et amples, aornees de painctures, de Cornes de cerfz et aultres choses spectables. Le logis des dames comprenoit depuis la tour Artice, jusques a la porte de Mesembrine. Les hommes occupoient le reste. Devant ledict logis des dames, affin qu’elles eussent l’esbatement, entre les deux premieres tours au dehors estoient les

lices, l’hippodrome, le theatre, et natatoires, avecques les bains mirificques a triple solier, bien garniz de tous assortemens et foyzon d’eau de Myrte. Jouxte la riviere estoyt le beau Jardin de plaisance. Au milieu d’icelluy le beau Labirynte. Entre les deux aultres tours estoient les jeuz de paulme et de la grosse balle. Du couste de la tour Cryere estoit le vergier plein de tous arbres fructiers, toutes ordonnees en ordre quincunce. Au bout estoyt le grand parc foizonnant en toute beste sauvagine. Entre les tierces tours estoient les buttes pour l’arquebuze / l’arc/ et l’arbaleste. Les offices hors la tour Hesperies a simple estaige. L’escurye au dela des offices. La faulconnerye au davant d’icelles, gouvernee par asturciers bien expers en l’art. Et estoit annuellement fournie par les Candiens/ Venitians / et Sarmates de toutes sortes d’oizeaux paragons. Aigles/ Autours/ Sacres / Laniers/ Faulcons/ Esparviers/ Emerillons/ et aultres: tant bien faictz et domesticques que partans du chasteau pour s’esbatre es champs prenoient tout ce que rencontroient. La venerie estoit ung peu plus loing tyrant vers le parc. Toutes les salles/ chambres/ et cabinetz estoient tapissez en diverses sortes scelon les saisons de l’annee. Tout le pave estoit couvert de drap verd. Les lictz estoient de broderie. En chascune arriere chambre estoit un mirouoir de chrystallin enchasse en or fin et au tour garny de perles, et estoyt de telle grandeur, qu’il povoit veritablement representer toute la personne. A l’issue des salles du logis des dames estoient les parfumeurs et testonneurs, par les mains desquelz passoient les hommes quand ilz visitoient les dames. Iceulx fournissoient par chascun matin les chambres des dames, d’eau de naphe et d’eau d’ange, et a chascune la precieuse cassollette vaporante de toutes drogues aromatiques.