Comment fut la Royne à soupper servie, et comment elle mangeoit. CHAP. XXII.

La dame, ces propos achevez, se retourna vers ses gentils-hommes, et

leurs dist: L'orifice du stomach, commun ambassadeur pour l'avitaillement de tous membres, tant inferieurs, que superieurs, nous importune le leur restaurer, par apposition de idoines alimens, ce que leur est descheut, par action continue de la naifve chaleur en l'humidité radicale, Spodizateurs, Cesinins, Nemains, et Perazons, par vous ne tienne que promptement ne soient tables dressees, foisonnantes de toute legitime espece de restaurans. Vous aussi, nobles Pregustes, accompagnez de mes gentils Massiteres, l'espreuve de vostre industrie passementee de soin et diligence fait, que ne vous puis donner ordre, que de sorte ne soyez en vos offices, et vous teniez tousjours sur vos gardes: Seulement vous ramente faire, ce que faictes. Ces mots achevez se retira avec part de ses damoiselles quelque peu de temps, et nous fut dict, que c'estoit pour soy baigner: comme estoit la coustume des anciens, autant usitee, comme est entre nous de present laver les mains, avant le past. Les tables feurent promptement dressees, puis feurent couvertes de nappes tresprecieuses. L'ordre du service fut tel, que la dame ne mangea rien, fors celeste ambrosie, rien ne beut que Nectar divin. Mais les seigneurs et dames de sa maison furent, et nous avec eux serviz de viandes rares, friandes et precieuses, si onques en songea Appicius.

Sus l'issue de table fut apporté un pot pourry, si par cas famine n'eust donné trefves, et estoit de telle amplitude et grandeur, que la platine d'or, laquelle Pythius Bithinus donna au Roy Daire, à peine l'eust couvert. Le pot pourry estoit plain de potages d'especes diverses, sallades, fricassees, saulgrenees, cabirotades, rousty, boully, carbonnades, grandes pieces de boeuf sallé, jambons de antiquailles, saulmates deifiques, pastissieres, tarteries, un monde de coscotons à la moresque: formages, joncades, gelees, fruicts de toutes sortes. Le tout me sembloit bon et friant: je toutefois n'y tasté, pour estre bien remply et refait. Seulement ay vous advertir, que là vy des pastez en paste, chose asses rare, et les pastez en paste estoient pastez en pot. Au fond d'iceluy j'apperceu forces dez, cartes, tarots luettes, eschets, et tabliers, avec plaine tasse d'escuz au soleil, pour ceux qui jouer voudroient.

Au dessous finablement j'advisay nombre de mulles bien phalerees, avec housses de velours, haquenees de mesme à usance d'hommes et femmes, lectieres bien veloutees

pareillement ne sçay combien, et quelques coches à la ferraroise pour ceux, qui voudroient aller hors à l'esbat.

Cela ne me sembla estrange, mais je trouvay bien nouvelle la maniere comment la dame mangeoit. Elle ne maschoit rien, non qu'elle n'eust dens fortes et bonnes, non que ses viandes ne requissent mastication, mais telle estoit son usage et coustume. Les viandes, desquelles ses Pregustes avoient fait essay, prenoient ses Massiteres, et noblement les luy maschoient, ayans le gosier doublé de satin cramoisi, à petites nerveures, et canetille d'or, et les dens d'Ivoire bel et blanc: moyennent lesquelles, quant ils avoient bien à poinct masché les viandes, ils les luy coulloient par un embut d'or fin jusques dedens l'estomach. Par mesme raison nous fut dict, qu'elle ne fiantoit sinon par procuration.