Comment fut en presence de la Quinte faict un bal joyeux, en forme de Tournay. CHAP. XXIII.

Le soupper parfait fut en presence de la dame fait un bal, en mode de Tournay, digne non seulement d'estre regardé, mais aussi de memoire eternelle. Pour

iceluy commencer fut le pavé de la salle couvert d'une ample piece de tapisserie veloutee, faite en forme d'eschiquier, savoir est, à carreaux, moitie blanc, moitie jaulne, chascun large de trois palmes, et tous carrez coustes. Quant en la salle entrerent 32 jeunes personnages, desquels seize estoient vestus de drap d'or, savoir est, huict jeunes Nymphes, ainsi que les peignoient les Anciens, en la compagnie de Diane, un Roy, une Royne, deux custodes de la Rocque, deux Chevaliers, et deux Archiers. En semblable ordre, estoient seize autres, vestus de drap d'argent. Leur assiette sus la tapisserie fut telle. Les Roys se tindrent en la derniere ligne, sus le quatriesme carreau, de sorte que le Roy Auré estoit sus le carreau blanc, le Roy Argenté sus le carreau jaulne, les Roynes à costé de leurs Roys: La d'oree sus le carreau jaulne, l'argentee sus le carreau blanc, deux archiers aupres de chascun costé, comme gardes de leurs Roys et Roynes. Aupres des archiers deux Chevaliers, aupres des Chevaliers, deux Custodes. Au ranc prochain devant eux estoient les huict Nymphes. Entre les deux bandes des Nymphes restoient vuides quatre rancs de carreaux. Chascune bande avoit de sa part ses musiciens, vestus de pareille livree, uns de damas orengé, autres de damas blanc: et estoient huict de chascun costé, avec instrumens tous divers, de joyeuse invention, ensemble mout concordans, et melodieux à merveilles, varians en tons, en temps, et mesure comme requeroit le progrez du bal. Ce que je trouvois admirable, attendu la numereuse diversité de pas, de desmarches, de saux, sursaux, retours, fuites, embuscades, retraictes et surprinses. Encore plus transcendoit opinion humaine, ce me sembloit, que les personnages du bal tant soudain entendoient le son, qui competoit à leurs desmarche ou retraicte: que plustost n'avoit signifie le ton la musique, qu'ils se poussoient en place designee: nonobstant que leur procedure fust toute diverse. Car les Nymphes, qui sont en premiere filliere comme prestes d'exciter le combat, marchent contre leurs ennemis droit en avant, en forme d'un carreau en outre: exceptee la premiere desmarche, en laquelle leur est libre passer deux carreaux: Elles seulles jamais ne reculer. S'il advient qu'une d'entr 'elles passe jusques à la filiere de son roy ennemy, elle est couronnee Royne de son Roy: et prent, et desmarche dorenavant en mesme privilege, que la Royne: autrement jamais ne ferissent les ennemis, que en ligne diagonale obliquement, et devant seulement. Ne leur est toutesfois, n'à autres loisible prendre aucuns de leurs ennemis, si le prenant, elles laissoient leur Roy descouvert, et en prinse.

Les Roys marchent et prennent leurs ennemis de toutes faces en carré: et ne passent que de carreau blanc et prochain au jaulne, et au contraire exceptez qu'a la premiere desmarche, si leur filliere estoit trouvee vuide d'autres officiers, fors les Custodes, ils le peuvent mettre en leur siege, et à coste de luy se retirer.

Les Roynes desmarchent, et prennent en plus grande liberté, que tous autres: savoir est en tous endroits, et en toutes manieres, en toutes sortes, en ligne directe, tant loing, que leur plaist, pourveu que ne soit des siens occupé: et diagonale aussi, pourveu que soit en couleur de son assiette.

Les Archiers marchent tant en avant, comme en arriere, tant loing, que pres. Aussi jamais ne varient la couleur de leur premiere assiette.

Les Chevaliers marchent, et prenent en forme ligneare, passant un siege franc, encores qu'il fust occupé, ou des siens, ou des ennemis: et au second soy posans à dextre,

ou à senestre en variation de couleur, qui est sault grandement dommageable à partie adverse, et de grande observation. Car ils ne prenent jamais à face ouverte: Les Custodes marchent et prenent à face tant à dextre, qu'à senestre, tant arriere, que devant, comme les Roys: et peuvent tant loing marcher qu'ils voudront en siege vuide, ce que ne font les Roys.

La loy commune es deux parties estoit en fin dernier du combat assieger et clorre le Roy de part adverse en maniere qu'evader ne peust de costé quelconque. Iceluy ainsi clos fuir ne pouvant, ny des siens estre secouru, cessoit le combat, et perdoit le Roy assiegé. Pour donques de cestuy inconvenient le guarentir, il n'est celuy ne celle de sa bande, qui n'y offre sa vie propre et se prenent les uns les autres de tous endroicts advenant le son de la musique. Quant aucun prenoient un prisonnier de part contraire, luy faisant la reverance, luy frappoit doucement en main dextre, le mettoit hors ce parquet, et succedoit en sa place. S'il advenoit qu'un des Roys fust en prise, n'estoit licite à partie adverse le prandre: ains estoit fait rigoreux commandement à celuy, qui l'avoit descouvert, ou le tenoit en prise, luy faire profonde

reverance, et l'advertir disant, Dieu vous gard: afin que de ses officiers fust secouru et couvert, ou bien qu'il changeast de place, si par malheur ne pouvoit estre secouru. N'estoit toutesfois prins de partie adverse, mais saluë, le genoil gauche en terre luy disant, bon jour. Là estoit fin du tournay.