¶Comment Janotus de Bragmardo feut envoye pour recouvrir de Gargantua les grosses cloches. Chapi. xvii.

tondu a la Cesarine, et vestu de son lyripipion theologal, et bien antidote l’estomac de coudignac de four, et eau beniste de cave/ se transporta au logys de Gargantua, touchant davant soy troys vedeaulx a rouge muzeau, et trainnant apres cinq ou six maistres inertes bien crottez a profit de mesnaige. A l’entree les rencontra Ponocrates : et eut frayeur en soy les voyant ainsi desguisez, et pensoyt que feussent quelques masques hors

Page [62]
du sens. Puis s’enquesta a quelq’un des dictz maistres inertes de la bande, que queroyt ceste mommerye? Il luy feut respondu, qu’ilz demandoient les cloches leurs estre rendues. Soubdain ce propos entendu Ponocrates alla dire les nouvelles a Gargantua : affin qu’il feust prest de la responce, et deliberast sur le champ ce que estoyt de fayre. Gargantua admoneste du cas appella a part Ponocrates son precepteur, Philotime son maistre d’hostel, Gymnaste son escuyer, et Eudemon, et sommairement confera avecques eulx suz ce que estoyt tant a fayre que a respondre. Tous feurent d’advis queon les menast au retraict du goubelet et la on les feist boyre theologalement, et affin que ce tousseux n’entrast en vaine gloire pour a sa requeste avoir rendu les cloches, l’on mandast ce pendent qu’il chopineroyt querir le Prevost de la ville, le Recteur de la faculte, et le Vicaire de l’eglise: es quelz, davant que le theologien eust propose sa commission, l’on delivreroyt les cloches. Apres ce yceulx presens l’on oyroyt sa belle harangue. Ce que feut faict, et les susdictz arrivez, le theologien feut en plene salle introduict, et commencza comme s’ensuyt en toussant.

Real    Hypothetical    Fictional    Mythical   
Region, area    Town, village    Building    Water (lakes, rivers, etc.)    mountains, islands, ...    Other