Comment Picrochole fuiant feut surprins de males fortunes et ce que feit Gargantua apres la bataille. Chap. xlix.

Picrochole ainsi desespere s'en fuyt vers L' isle Bouchart, et au chemin de Riviere son cheval bruncha par terre, a quoy tant feut indigne que de son espee le tua en sa chole, puis ne trouvant personne qui le remontast voulut prendre un asne du moulin qui la aupres estoit, mais les meusniers le meurtrirent tout de coups, et le destrousserent de ses habillemens, et luy baillerent pour soy couvrir une meschante sequenye. Ainsi s'en alla le pauvre cholericque, puis passant l'eau au port Huaux, et racontant ses males fortunes feut advise par une vieille Lourpidon,

que son royaulme luy seroit rendu, a la venue des Cocquecigrues; depuis ne scait on qu'il est devenu. Toutesfoys l'on m'a dict qu'il est de present pauvre gaignedenier a Lyon cholere comme davant. Et tousjours se guemente a tous estrangiers de la vonue des Cocquecigrues, esperant certainement scelon la prophetie de la vieille, estre a leur venue reintegre a son royaulme. Apres leur retraicte Gargantua premierement recensa les gens, et trouva que peu d'iceulx estoient peryz en la bataille, scavoir est quelques gens de pied de la bande du capitaine Tolmere, et Ponocrates qui avoit un coup de harquebouze en son pourpoinct. Puis les feist refraischer chascun par sa bande et commanda es thesauriers que ce repas leur feust defraye et paye, et que l'on ne feist oultrage quelconques en la ville, veu qu'elle estoit sienne, et apres leur repas ilz comparussent en la place davant le chasteau, et la seroient payez pour six moys. Ce que feut faict, puis feist convenir davant soy en ladicte place tous ceulx qui la restoient de la part de Picrochole, esquelz presens tous ses Princes et capitaines parla comme s'ensuyt.