La ferveur de tes estudes requeroit que de long temps ne te revocasse de cestuy philosophicque repous, sy la confiance de noz amys et anciens confederez n'eust de present frustre la seurete de ma vieillesse. Mais puis que telle est ceste fatale destinee, que par iceulx soye inquiete: es quelz plus je me repousoye, force me est te rappeller au subside des gens et biens qui te sont par droict naturel affiez.

Car ainsi comme debiles sont les armes au dehors, si le conseil n'est en la maison: aussi vaine est l'estude et le conseil inutile: qui en temps oportun par vertus n'est execute et a son effect reduict.

Ma deliberation n'est de provocquer ains de apaiser: d'assaillir, mais defendre: de conquester, mais de guarder mes feaulx subjectz et terres hereditaires. Es quelles est hostillement entre Picrochole, sans cause ny occasion, et de jour en jour poursuit sa furieuse entreprinse, avecques exces non tolerables a personnes liberes.

Je me suis en devoir mis pour moderer sa cholere tyrannicque, luy offrent tout ce que je pensois luy povoir estre en contentement, et par plusieurs foys ay envoye amiablement devers luy pour entendre en quoy, par qui, et comment il se sentoit oultrage, mais de luy n'ay eu responce que de voluntaire deffiance, et que en mes terres pretendoit seulement droict de bien seance.

Pourtant mon filz bien ayme le plus tost que faire pouras ces lettres veues retourne a diligence secourir non tant moy (ce que toutesfoys par pitie naturellement tu doibs) que les tiens, lesquelz par raison tu peuz saulver et guarder. L'exploict sera faict a moindre effusion de sang que sera possible. Et si possible est par engins plus expediens, cauteles, et ruzes de guerre nous saulverons toutes les ames: et les envoyerons joyeux a leurs domiciles.

Treschier filz la paix de Christ nostre redempteur soyt avecques toy. Salue Ponocrates, Gymnaste, et Eudemon de par moy. Du vingtiesme de Septembre. Ton pere Grandgousier.