François Rabelais, Gargantua (1542)

Les jeux de Gargantua. Chapitre. xxij.

Puis tout lordement grignotant d'un transon de graces, se lavoit les mains de vin frais, s'escuroit les dens avec un pied de porc, et devisoit joyeusement avec ses gens: puis le verd estendu l'on desployoit force chartes, force dez, et renfort de tabliers. La jouoyt, Au flux A la prime A la vole A la pille

Page Fu.57.
A la triumphe A la Picardie Au cent A l'espinay A la malheureuse Au fourby A passe dix A trente et ung. A pair et sequence A troys cens Au malheureux A la condemnade A la charte virade Au maucontent Au lansquenet Au cocu A qui a si parle A pille, nade, jocque, fore A mariaige Au gay A l'opinion A qui faict l'ung faict l'aultre A la sequence Au luettes
Page [57v]
Au tarau A coquinbert qui gaigne perd Au beline Au torment A la ronfle Au glic Aux honneurs A la mourre Aux eschetz Au renard Au marelles Au vasches A la blanche A la chance A trois dez Au tables A la nicnocque Au lourche A la renette Au barignin Au trictrac A toutes tables Au tables rabatues Au reniguebieu
Page Fu.58.
Au force Au dames A la babou A primus secundus Au pied du cousteau Au clefz Au franc du carreau A pair ou non A croix ou pille Au martres Au pingres A la bille Au savatier Au hybou Au dorelot du lievre A la tirelitantaine A cochonnet va devant Au pies A la corne Au beuf viole A la cheveche A je te pinse sans rire A picoter A deferrer l'asne
Page [58v]
A la jautru Au bourry bourry zou A je m'assis A la barbe d'oribus A la bousquine A tire la broche A la boutte foyre A compere prestez moy vostre sac A la couille de belier A boute hors A figues de marseille A la mousque A l'archer tru A escorcher le renard A la ramasse Au croc madame A vendre l'ovoine A souffler le charbon Au responsailles Au juge vif, et juge mort A tirer les fers du four Au fault villain Au cailleteaux Au bossu aulican
Page Fu.59.
A sainct trouve A pinse morille Au poirier A pimpompet Au triori Au cercle A la truye A ventre contre ventre Aux combes A la vergette Au palet Au j'en suis A foucquet Au quilles Au rapeau A la boulle plate Au vireton Au picquarome A rouchemerde A angenart A la courte boulle A la griesche A la recoquillette Au cassepot
Page [59v]
A montalent A la pyrouete Au jonchees Au court baston Au pyrevollet A cline muzete Au picquet A la blancque Au furon A la seguette Au chastelet A la rengee A la foussete Au ronflart A la trompe Au moyne Au tenebry A l'esbahy A la soulle A la navette A fessart Au ballay A sainct Cosme je te viens adorer A escharbot le brun
Page Fu.60.
A je vous prens sans verd A bien et beau s'en va quaresme Au chesne forchu Au chevau fondu A la queue au loup A pet en gueulle A Guillemin baille my ma lance A la brandelle Au treseau Au bouleau A la mousche A la migne migne beuf Au propous A neuf mains Au chapifou Au pontz cheuz A colin bride A la grolle Au cocquantin A Colin maillard A myrelimofle A mouschart Au crapault A la crosse
Page [60v]
Au piston Au bille boucquet Au roynes Au mestiers A teste a teste bechevel Au pinot A male mort Aux croquinolles A laver la coiffe ma dame Au belusteau A semer l'avoyne A briffault Au molinet A defendo A la virevouste A la bacule Au laboureur A la cheveche Au escoublettes enraigees A la beste morte A montemonte l'eschelette Au pourceau mory A cul salle Au pigonnet
Page Fu.61.
Au tiers A la bourree Au sault du buisson A croyzer A la cutte cache A la maille bourse en cul Au nid de la bondree Au passavant A la figue Au petarrades A pillemoustarde A cambos A la recheute Au picandeau A croqueteste A la grolle A la grue A taillecoup Au nazardes Aux allouettes Aux chinquenaudes.

Apres avoir bien joué sessé passé et beluté temps, convenoit boyre quelque peu, c'estoient unze peguadz pour homme,

Page [61v]
et soubdain apres bancqueter c'estoit sus un beau banc, ou en beau plein lict s'estendre et dormir deux ou troys heures sans mal penser, ny mal dire.

Luy esveille secouoit un peu les aureilles: ce pendent estoit apporte vin frais, la beuvoit mieulx que jamais.

Ponocrates luy remonstroit, que c'estoit mauvaise diete, ainsi boyre apres dormir. C'est (respondist Gargantua) la vraye vie des peres. Car de ma nature je dors sallé: et le dormir m'a valu autant de jambon.

Puis commencoit estudier quelque peu, et patenostres en avant, pour lesquelles mieulx en forme expedier, montoit sus une vieille mulle, laquelle avoit servy neuf Roys, ainsi marmotant de la bouche et dodelinant de la teste, alloit veoir prendre quelque connil aux filletz.

Au retour se transportoit en la cuysine pour scavoir quel roust estoit en broche.

Page Fu.62.

Et souppoit tresbien par ma conscience, et voluntiers convioit quelques beuveurs de ses voisins, avec lesquelz beuvant d'autant, comptoient des vieux jusques es nouveaulx.

Entre aultres avoit pour domesticques les seigneurs du Fou, de Gourville, de Grignault et de Marigny.

Apres souper venoient en place les beaux evangiles de boys, c'est a dire force tabliers, ou le beau flux, un, deux troys: ou a toutes restes pour abreger, ou bien alloient veoir les garses d'entour, et petitz bancquetz parmy collations et arrierecollations. Puis dormoit sans desbrider, jusques au lendemain huict heures.

Réel    Hypothétique    Fictif    Mythique   
Région, contrée    Ville, village    Bâtiment    Étendue, cours d'eau    Montagne, île, ...    Autre