Comment Panurge expose l'enigme de Grippe -minaud. CHAP. XIII.

Grippe minaud faisant semblant n'entendre ce propos s'adresse à Panurge, disant. Orça, orça, orça, et toy guoguelu n'y veux tu rien dire? respondit Panurge, or de par le diable là je voy clerement que la peste est icy pour nous, or de par le diable là, veu qu'Innocence n'y est point en seureté, et que le diable y chante messe, or de par le diable là. Je vous prie que pour tous je la paye, Or de par le diable là, et nous laisse aller: Je n'en puis plus, Orça de par le diable là. Aller dist Grippe-minaud,

Page [54]
orça encores n'advint depuis trois cens ans en ça, orça, que personne eschappast de ceans, sans y laisser du poil, orça, ou de la peau pour le plus souvent, orça. Car quoy, orça, ce seroit à dire que pardevant nous icy serois injustement convenu, orça, et de par nous injustement traité. Orça malheureux es tu bien, orça: mais encores plus le seras, orça, si ne responds à l'Enigme proposé, orça, que veult-il dire, orça.

C'est, or de par le diable là, respondit Panurge, un cosson noir, né d'une febve blanche, or de par le diable là, par le trou qu'il avoit faict la rongeant, or de par le diable là: lequel aucunefois volle, aucunefois chemine en terre, or de par le diable là: dont fut estimé de Pythagoras premier amateur de sapience, c'est en Grec Philosophe, or de par le diable là: avoir d'ailleurs par metempsichosie ame humaine receuë, or de par le diable là. Si vous autres estiez hommes, or de par le diable là, apres vostre male mort, selon son opinion vos ames entreroient en corps de cossons, or de par le diable là. Car en ceste vie vous rongez et mangez tout: en l'autre vous rongeriez et mangerez, comme viperes, les costez propres de vos meres, or de par le diable là.

Page [55]

Cor dieu, dist frere Jean, de bien bon coeur je souhaiterois que le trou de mon cul devienne febve, et au tour soit de ces cossons mangé.

Panurge ces mots achevez jetta au millieu du parquet une grosse bource de cuir, plaine d'escus au soleil. Au son de sa bource commencerent tous les Chats-fourrez jouer des griphes, comme si fussent violons demanchez. Et tous s'escrierent à haulte voix disans: Ce sont les espices: le proces fut bien bon, bien friant, et bien espicé. Ils sont gens de bien. C'est or, dist Panurge, je dis escus au soleil. La Cour, dit Grippe- minaud, l'entend, or bien, or bien, or bien. Allez enfans, or bien, et passez outre, or bien, nous ne sommes tant diables, or bien, que sommes noirs, or bien, or bien, or bien.

Issans du Guischet fusmes conduits jusques au port par certains griphons de montagnes: avant entrer en nos navires fusmes par iceux advertis que n'eussions à chemin prendre sans premier avoir faict presens seigneuriaux tant à la dame Grippe -minaude, qu'a toutes les Chattes fourrees: autrement avoient commission nous remener au guischet. Bran, respondit frere Jean, nous icy à l'escart visiterons le font de nos deniers, et donnerons à tous contentement.

Page [56]
Mais dirent les garsons, n'oubliez, le vin des pauvres diables. Des pauvres diables, respondit frere Jean, jamais n'est en oubly le vin, mais est memorial en tout païs, et toutes saisons.

Real    Hypothetical    Fictional    Mythical   
Region, area    Town, village    Building    Water (lakes, rivers, etc.)    mountains, islands, ...    Other