Comment les portes du temple par soy-mesme admirablement s'entr'ouvrirent. CHAP. XXXVI.

En fin des degrez rencontrasmes un portal de fin jaspe, tout compassé et basty à ouvrage et forme dorique: en la face duquel estoit, en letres Ioniques d'or trespeur escrite ceste sentence En oinc alhueia. c'est à dire, en vin verité. Les deux parties estoient d'arain, comme Corinthian, massives, faites à petites vinettes, enlevees, et esmaillees mignonnement, selon l'exigence de la sculpture: et estoient ensemble jointes, et refermees esgalement

Page [153]
en leur mortaise, sans clavier, et sans catenat, sans lyaison aucune. Seulement y pendoit un Diamant Indique, de la grosseur d'une febve Egyptiatique, enchassé en or obrizé, à deux pointes, en figure exagone, et en ligne directe: à chascun costé vers le mur, pendoit une poignee de Scordeon.

Là nous dist nostre noble Lanterne, qu'eussions son excuse pour legitime, si elle desistoit plus avant nous conduire: Seulement qu'eussions à optemperer és Instructions de la Pontife Bacbuc : Car entrer dedans ne luy estoit permis, pour certaines causes, lesquelles taire meilleur estoit à gens vivans vie mortelle, qu'exposer. Mais en tout evenement, nous commanda estre en cerveau, n'avoir frayeur ne peur aucune, et d'elle se confier pour la retraicte: puis tira le Diamant pendant à la commissure des deux portes, et à dextre le jetta dedans une capse d'argent, à ce expressement ordonnee: tira aussi de l'essueil de chascune porte, un cordon de soye cramoisine longue d'une toise et demie, auquel pendoit le Scordon, l'attacha à deux boucles d'or, expressement pource pendantes aux costez, et se retira à part.

Soudainement les deux portes, sans que personne y touchast, de soy-mesme s'ouvroient,

Page [154]
et s'ouvrant firent, non bruit strident, non fremissement horrible, comme font ordinairement portes de bronze, rudes et pesantes, mais doux et gratieux murmur, retentissant par la voulte du temple, duquel soudain Pantagruel entendit la cause, voyant sous l'extremité de l'une et l'autre porte, un petit cylindre, lequel par sus l'essueil joignoit la porte, et se tournant selon qu'elle se tiroit vers le mur, dessus une dure pierre d'Ophytes, bien terse et esgalement polie, par son frottement faisoit ce doux et harmonieux murmur.

Bien je m'esbahissois comment les deux portes, chascune par soy, sans l'oppression de personne estoient ainsi ouvertes: pour cestuy cas merveilleux entendre, apres que tous fusmes dedans entrez je projettay ma veuë entre les portes, et le mur, convoiteux de scavoir par quelle force, et par quel instrument estoient ainsi refermees: doutant que nostre amiable Lanterne eust à la conclusion d'icelles, apposé l'herbe dite Ethiopis, moyennant laquelle on ouvre toutes choses fermees: mais j'apperçeu que la part en laquelle les deux portes se fermoient, en la mortaise interieure, estoit une lame de fin acier, enclavee sur la bronze Corinthiane.

Page [155]

J'apperçeu d'avantage deux tables d'Aimant Indiques, amples et espoisses de demye paume, à couleur cerulee, bien licees et bien polies: d'icelles toute l'espoisseur estoit dedans le mur du temple engravee, à l'endroit auquel les portes entierement ouvertes, avoient le mur pour fin d'ouverture.

Par, donques, la rapacité violente de l'Aimant, les lames d'Acier, par occulte et admirable institution de nature, patissoient cestuy mouvement: consequemment les portes y estoient lentement ravies et portees, non tousjours toutesfois, mais seulement l'Aimant susdit osté: par la prochaine session duquel l'Acier estoit de l'obeissance qu'il a naturellement à l'Aimant absout et dispensé, ostees aussi les deux poignees de Scordeon, lesquelles nostre joyeuse Lanterne avoit, par le cordon cramoisin, eslongnees et suspendues, par ce qu'il mortifie l'Aimant et despouille de ceste vertu attractive. En l'une des tables susdites à dextre, estoit exquisitement insculpé en lettres Latines antiquaires ce vers Iambique senaire.


Ducunt volentem fata, nolentem trahunt.

Les destinees meuvent celuy qui consent, tirent celuy qui refuse. En l'autre je

Page [156]
veis à senestre en majuscules lettres elegantement insculpé ceste sentence.


Toutes choses se meuvent à leur fin.

Real    Hypothetical    Fictional    Mythical   
Region, area    Town, village    Building    Water (lakes, rivers, etc.)    mountains, islands, ...    Other   
0 Place