Page Fu.98.

Comment Gymnaste soupplement tua le capitaine Tripet, et aultres gens de Picrochole. Chapitre. xxxv.

Ces motz entenduz, aulcuns d'entre eulx commencerent avoir frayeur, et se seignoient de toutes mains pensans que ce feust un Diable desguise, et quelqun d'eulx nomme Bon Joan, capitaine des franctopins, tyra ses heures de sa braguette et cria assez hault, Agios hotheos. Si tu es de Dieu sy parle, sy tu es de l'aultre sy t'en va. Et pas ne s'en alloit, ce que entendirent

Page [98v]
plusieurs de la bande, et departoient de la compaignie. Le tout notant et considerant Gymnaste. Pourtant feist semblant descendre de cheval, et quand feut pendent du couste du montouer feist soupplement le tour de l'estriviere, son espee bastarde au couste, et par dessoubz passe se lanca en l'air, et se tint des deux piedz sus la scelle le cul tourne vers la teste du cheval. Puis dist. Mon cas va au rebours. Adoncq en tel poinct qu'il estoit feist la guambade sus un pied, et tournant a senestre, ne faillit oncq de rencontrer sa propre assiete sans en rien varier. Dont dist Tripet, Ha ne feray pas cestuy la pour ceste heure, et pour cause. Bren dist Gymnaste, j'ay failly, je voys defaire cestuy sault. Lors par grande force et agilite feist en tournant a dextre la gambade comme davant. Ce faict mist le poulce de la dextre sus l'arcon de la scelle, et leva tout le corps en l'air, se soustenant tout le corps sus le muscle, et nerf
Page Fu.99.
dudict poulce: et ainsi se tourna troys foys, a la quatriesme se renversant tout le corps sans a rien toucher se guinda entre les deux aureilles du cheval, soudant tout le corps en l'air sus le poulce de la senestre: et en cest estat feist le tour du moulinet, puis frappant du plat de la main dextre sus le meillieu de la selle se donna tel branle qu'il se assist sus la crope, comme font les damoiselles. Ce faict tout a l'aise passe la jambe droicte par sus la selle, et se mist en estat de chevaucheur, sus la croppe. Mais (dist il) mieulx vault que je me mette entre les arsons: adoncq se appoyant sus les poulces des deux mains a la crope davant soy, se renversa cul sus teste en l'air, et se trouva entre les arsons en bon maintien, puis d'un sobresault leva tout le corps en l'air, et ainsi se tint piedz joinctz entre les arsons, et la tournoya plus de cent tours les bras estenduz en croix, et crioit ce faisant a haulte
Page [99v]
voix. J'enrage diables j'enrage, j'enrage, tenez moy diables tenez moy tenez. Tandis qu'ainsi voltigeoit, les marroufles en grand esbahissement disoient l'ung a l'aultre. Par la mer dé c'est un lutin, ou un diable ainsi deguise. Ab hoste maligno libera nos domine: et fuyoient a la route regardans darriere soy, comme un chien qui emporte un plumail. Lors Gymnaste voyant son advantaige descend de cheval: desguaigne son espee, et a grands coups chargea sus les plus huppes, et les ruoit a grands monceaulx blessez, navrez, et meurtriz, sans que nul luy resistast, pensans que ce feust un diable affame, tant par les merveilleux voltigemens qu'il avoit faict: que par les propos que luy avoit tenu Tripet, en l'appellant pauvre diable. Si non que Tripet en trahison luy voulut fendre la cervelle de son espee lansquenette, mais il estoit bien armé, et de cestuy coup ne sentit que le chargement, et soubdain se tournant,
Page Fu.100.
lancea un estoc volant audict Tripet, et ce pendent que icelluy se couvroit en hault, luy tailla d'un coup l'estomac, le colon, et la moytie du foye, dont tomba par terre, et tombant rendit plus de quatre potees de souppes, et l'ame meslee parmy les souppes. Ce faict Gymnaste se retyre considerant que les cas de hazart jamais ne fault pour suyvre jusques a leur periode: et qu'il convient a tous chevaliers reverentement traicter leur bonne fortune, sans la molester ny gehainer. Et monstant sus son cheval luy donne des esperons tyrant droict son chemin vers la Vauguyon, et Prelinguand avecques luy.

Real    Hypothetical    Fictional    Mythical   
Region, area    Town, village    Building    Water (lakes, rivers, etc.)    mountains, islands, ...    Other