Comment Gargantua assaillit Picrochole dedans la Rocheclermaud et defist l'armee dudict Picrochole. Chap. xlviij.

Gargantua eut la charge totale de l'armee, son pere demoura en son fort. Et leur donnant couraige par bonnes parolles, promist grandz dons a ceulx qui feroient quelques prouesses. Puis gaignerent le gué de Vede, et par basteaulx et pons legierement faictz passerent oultre d'une traicte. Puis considerant l'assiete de la ville que estoit en lieu hault et adventageux, delibera celle nuyct sus ce qu'estoit de faire. Mais Gymnaste luy dist Seigneur telle est la nature et complexion des Francoys, que ilz ne valent que a la premiere poincte. Lors ils sont pires que diables. Mais

s'ilz sejournent ilz sont moins que femmes. Je suis d'advis que a l'heure presente apres que voz gens auront quelque peu respire et repeu, faciez donner l'assault. L'advis feut trouve bon. Adoncques produict toute son armee en plain camp, mettant les susdictes du couste de la montee. Le moyne print avecques luy six enseignes de gens de pied, et deux cens hommes d'armes, et en grande diligence traversa les marays, et gaingna au dessus le puy jusques au grand chemin de Loudun. Ce pendent l'assault continuoit, les gens de Picrochole ne scavoient si le meilleur estoit sortir hors et les recepvoir, ou bien guarder la ville sans bouger. Mais furieusement sortit avecques quelque bande d'hommes d'armes de sa maison: et la feut receu et festoye a grandz coups de canon qui gresloient devers les coustaux, dont les Gargantuistes se retirerent au val, pour mieulx donner lieu a l'artillerye. Ceulx de la ville defendoient le mieulx que povoient, mais les traictz passoient oultre par dessus sans nul ferir. Aulcuns de la bande saulvez de l'artillerie donnerent fierement sus nos gens, mais peu profiterent, car tous feurent repceuz entre les ordres, et la ruez par terre. Ce que voyans se vouloient retirer, mais ce pendent le moyne avoit occupe la passaige. Parquoy se mirent en fuyte sans ordre ny maintien. Aulcuns vouloient leur donner la chasse, mais le moyne les retint craignant que suyvant les fuyans perdissent leurs rancz, et que sus ce poinct ceulx de la ville chargeassent sus eulx. Puis attendant quelque espace, et nul ne comparant a l'encontre, envoya le duc Phrontiste pour admonnester Gargantua a ce qu'il avanceast pour gaigner le cousteau a la gauche pour empescher la retraicte de Picrochole par celle porte. Ce que feist Gargantua en toute diligence, et y envoya quatre legions de la compaignie de Sebaste, mais si tost ne peurent gaigner le hault, qu'ilz ne rencontrassent en barbe Picrochole et ceulx qui avecques luy s'estoient espars. Lors chargerent sus roiddement, toutesfoys grandement feurent endommaigez par ceulx qui estoient sus les murs en coupz de traict et artillerie. Quoy voyant Gargantua en grande puissance alla les secourir, et commenca son artillerie a hurter sus ce quartier de murailles, tant que toute la force de la ville y feut revocquee. Le moyne voyant celluy couste lequel il tenoit assiege, denué de gens et guardes, magnanimement tyra vers le fort et tant feist qu'il monta sus luy et aulcuns de ses gens pensant que plus de crainte et de frayeur donnent ceulx qui surviennent a un conflict, que ceulx qui lors a leur force combattent. Toutesfoys ne feist oncques effroy, jusques a ce que tous les siens eussent guaigne la muraille excepte les deux cens hommes d'armes qu'il laissa hors pour les hazars. Puis s'escria horriblement et les siens ensemble, et sans resistence tuerent les guardes d'icelle porte, et la ouvrirent hommes d'armes et en toute fierete coururent ensemble vers la porte de L'orient, ou estoit le desarroy. Et par derriere renverserent toute leur force. Voyans les assiegez de tous coustez, et les Gargantuistes avoir gaigne la ville, se rendirent au moyne a mercy. Le moyne leurs feist rendre les bastons et armes et tous retirer et reserrer par les eglises saisissant tous les bastons des croix, et commettant gens es portes pour les garder de yssir. Puis ouvrant celle porte orientale sortit au secours de Gargantua. Mais Picrochole pensoit que le secours luy venoit de la ville et par oultrecuidance se hazarda plus que devant: jusques a ce que Gargantua s'escrya. Frere Jan mon amy, frere Jan en bon heure soyez venu. Adoncques congnoissant Picrochole et ses gens que tout estoit desespere, prindrent la fuyte en tous endroictz. Gargantua les poursuyvit jusques pres Vaugaudry tuant et massacrant, puis sonna la retraicte.