Comment nous descendisme soubs terre, pour entrer au temple de la Bouteilletemple de la BouteilleBouteille, et comment Chinon est la premiere ville du monde. CHAP. XXXIIII.

Ainsi descendismes sous terre, par un arceau incrusté de plastre, peint au dehors rudement d'une danse de femmes et Satyres, accompagnans le vieil Silenus,

riant sus son Asne. Là je disois à Pantagruel ceste entree me revoque en souvenir la cave peinte de la premiere ville du monde: Car là sont peinctures pareilles, en pareille fraischeur comme icy? ou est, demanda Pantagruel, qui est ceste premiere ville que dites? Chinon, di-je, ou Caynon en Touraine. Je scay, respondit Pantagruel, ou est Chinon, et la cave peinte aussi, j'y ay beu maints verres de vin frais, et ne fais doute aucune que Chinon ne soit ville antique, son blason l'atteste, auquel est dit deux, ou trois fois, Chinon, petite ville grand renom, assise sus pierre ancienne, au haut le bois, au pied Vienne. Mais comment seroit elle ville premiere du monde, ou le trouvez vous par escrit, quelle conjecture en avez? Je dy: trouve en, l'Escriture sacree que Cayn fut premier bastisseur de villes: vray donques semblable est, que la premiere, il de son nom nomma Cainon, comme depuis ont à son imitation tous autres fondateurs, et instaurateurs de villes, imposé leurs noms à icelles. Athene, c'est en Grec Minerve, à Athenes, Alexandre à Alexandrie, Constantin à Constantinople, Pompee à Pompeiopolis en Cilicie, Adrian à Adrianople, Canaan aux Cananeens, Saba aux Sabeians, Assur aux Assyriens, Ptolemaïs, Cesarea, Tiberium, Herodium en Judee. Nous tenans ces menus propos sortit le grand flasque (nostre Lanterne l'appelloit phlosque) gouverneur de la dive Bouteille, accompagné de la garde du temple, et estoient tous Bouteillons François. Iceluy nous voyans Tyrsigeres, comme j'ay dit, et couronnez de Lierre, recognoissant aussi nostre insigne Lanterne, nous fist entrer en seureté, et commanda que droit on nous menast à la princesse Bacbuc, dame d'honneur de la Bouteille, et Pontife de tous les mysteres. Ce que fut fait.