Mal traictez et mal repeus au païs de Satin, navigasmes par trois jours, au quatriesme, en bon heur, approchasmes de Lanternois. Approchans voyons sur mer certains petits feuz volans: de ma part, je pensois que fussent, non lanternes, mais poissons, qui de la langue flamboyans hors la mer fissent feu: ou bien Lampyrides, vous les appellez cicindeles, là reluisans, comme au soir font en ma patrie, l'orge venant à maturité. Mais le Pilot nous advertit, que c'estoient lanternes des guets: lesquelles au tour de la banlieuë descouvroient le païs, et faisoient escorte à quelques lanternes estrangeres, qui comme bons Cordeliers et Jacobins, alloient la comparoistre, au chapitre Provincial: Doutans toutesfois que fust quelque prognostic de tempeste nous asseura, qu'ainsi estoit.