Comment estoit le manoir des Thelemites. Chapitre. lv.

Au millieu de la basse court estoit une fontaine magnificque de bel Alabastre. Au dessus les troys Graces avecques cornes d'abondance. Et gettoient l'eau par les mamelles, bouche, aureilles, yeulx, et aultres ouvertures du corps.

Le dedans du logis sus ladicte basse court estoit sus gros pilliers de Cassidoine et Porphyre, a beaulx ars d'antique. Au dedans desquelz estoient belles gualeries longues et amples, aornées de pinctures, et cornes de cerfz, licornes. Rhinoceros, Hippopotames, dens de Elephans, et aultres choses spectables. Le logis des dames comprenoit depuis la tour Artice, jusques a la porte Mesembrine. Les hommes occupoient le reste. Devant ledict logis des dames, affin qu'elles eussent l'esbatement, entre les deux premieres tours: au dehors estoient les lices, l'hippodrome, le theatre, et natatoires, avecques les bains

mirificques a triple solier, bien garniz de tous assortemens et foyzon d'eau de Myre, jouxte la riviere estoit le beau jardin de plaisance. Au millieu d'icelluy le beau Labirynte. Entre les deux aultres tours estoient les jeux de paulme et de grosse balle. Du couste de la tour Cryere estoit le vergier plein de tous arbres fructiers, toutes ordonnées en ordre quincunce. Au bout estoit le grand parc, foizonnant en toute sauvagine. Entre les tierces tours estoient les butes pour l'arquebuse, l'arc, et l'arbaleste. Les offices hors la tour Hesperie a simple estaige. L'escurye au dela des offices. La faulconnerie au davant d'icelles, gouvernée par asturciers bien expers en l'art. Et estoit annuellement fournie par les Candiens, Venitiens, et Sarmates de toutes sortes d'oiseaux paragons. Aigles, Gerfaulx, Autours, Sacres, Laniers, Faulcons, Esparviers, Esmerillons,

Et aultres: tant bien faictz et domesticquez que partans du chasteau pour s'esbatre es champs prenoient tout ce que rencontroient. La venerie estoit un peu plus loing tyrant vers le parc.

Toutes les salles, chambres, et cabinetz estoient tapissez en diverses sortes selon les saisons de l'annee. Tout le pave estoit couvert de drap verd. Les lictz estoient de broderie. En chascune arriere chambre estoit un miroir de christallin enchassé en or fin, au tour garny de perles, et estoit de telle grandeur, qu'il povoit veritablement representer toute la personne. A l'issue des salles du logis des dames estoient les parfumeurs et testonneurs, par les mains desquelz passoient les hommes quant ilz visitoient les dames. Iceulx fournissoient par chascun matin les chambres des dames, d'eau rose, d'eau de naphe, et d'eau d'ange, et a chascune la precieuse cassollette vaporante de toutes drogues aromatiques.