Comment estoient vestuz les religieux et religieuses de Theleme. Chapitre. lvj.

Les dames au commencement de la fondation se habilloient a leur plaisir et arbitre. Depuis feurent reformeez par leur franc vouloir en la facon que s'ensuyt. Elles portoient chausses d'escarlatte, ou de migraine, et passoient lesdictes chausses le genoul au dessus par troys doigtz, justement. Et ceste liziere estoit de quelques belles broderies et des coupeures. Les jartieres estoient de la couleur de leurs bracelletz, et comprenoient le genoul au dessus et dessoubz.

Les souliers, escarpins, et pantoufles de velours cramoizi rouge, ou violet, deschicquettées a barbe d'escrevisse.

Au dessus de la chemise vestoient la belle Vasquine de quelque beau camelot de soye. Sus icelle vestoient la

Verdugale de tafetas blanc, rouge, tanné grys etc. Au dessus, la cotte de tafetas d'argent faict a broderies de fin or et a l'agueille entortillé, ou selon que bon leur sembloit et correspondent a la disposition de l'air, de satin, damas, velours orange, tanné, verd, cendré, bleu, jaune, clair, rouge, cramoyzi, blanc, drap d'or, toille d'argent, de canetille, de brodure selon les festes. Les robbes selon la saison, de toille d'or a frizure d'argent, de satin rouge couvert de canetille d'or, de tafetas blanc, bleu, noir, tanné, sarge de soye, camelot de soye, velours, drap d'argent, toille d'argent, or traict, velours ou satin porfilé d'or en diverses protraictures. En esté quelques jours en lieu de robbes portoient belles Marlottes des parures susdictes, ou quelques bernes a la Moresque de velours violet a frizure d'or sus canetille d'argent, ou a cordelieres d'or garnies aux rencontres de petites perles Indicques. Et tousjours le beau panache scelon les couleurs des manchons et bien guarny de papillettes d'or. En hyver robbes de tafetas des couleurs comme dessus: fourrées de loups cerviers, genettes noires, martres de Calabre zibelines, et aultres fourrures precieuses. Les patenostres, anneaulx, jazerans, carcans, estoient de fines pierreries, escarboucles, rubys, balays, diamans saphiz, esmeraudes, turquoyzes, grenatz, agathes, berilles, perles et unions d'excellence.

L'acoustrement de la teste estoit selon le temps. En hyver a la mode Francoyse. Au prin temps a L'espagnole. En esté a la Tusque. Exceptez les festes et dimanches, esquelz portoient accoustrement Francoys, par ce qu'il est plus honorable, et mieulx sent la pudicité matronale. Les hommes estoient habillez a leur mode, chausses pour le bas d'estamet ou serge drape d'escarlatte, de migraine, blanc ou noir. Les hault de velours d'icelles couleurs ou bien pres approchantes: brodées et deschicquetées

selon leur invention. Le pourpoint de drap d'or, d'argent, de velours, satin, damas, tafetas, de mesmes couleurs, deschicquettés, broudez, et acoustrez en paragon. Les aguillettes de soye de mesmes couleurs, les fers d'or bien esmaillez. Les sayez et chamarres de drap d'or, toille d'or, drap d'argent, velours porfilé a plaisir. Les robbes autant precieuses comme des dames. Les ceinctures de soye de couleurs du pourpoinct, chascun la belle espée au cousté, la poignee dorée, le fourreau de velours de la couleur des chausses, le bout d'or, et de orfevrerie. Le poignart de mesmes.

Le bonnet de velours noir, garny de force bagues et boutons d'or. La plume blanche par dessus mignonnement, partie a paillettes d'or: au bout desquelles pendoient en papillettes, beaulx rubiz, esmerauldes etc. Mais telle sympathie estoit entre les hommes et les femmes, que par chascun jour ilz estoient vestuz de semblable parure. Et pour a

ce ne faillir estoient certains gentilz hommes ordonnez pour dire es hommes par chascun matin, quelle livree les dames vouloient en icelle journée porter. Car le tout estoit faict selon l'arbitre des dames. En ces vestements tant propres et accoustremens tant riches, ne pensez que eulx ny elles perdissent temps aulcun, car les maistres des garderobbes avoient toute la vesture tant preste par chascun matin: et les dames de chambre tant bien estoient aprinses, que en un moment elles estoient prestes et habillez de pied en cap. Et pour iceulx acoustremens avoir en meilleur oportunité.

Au tour du boys de Thelemeboys de ThelemeTheleme estoit un grand corps de maison long de demye lieue, bien clair et assorty, en laquelle demouroient les orfevres, lapidaires brodeurs, tailleurs, tireurs d'or, veloutiers, tapissiers, et aultelissiers, et la oeuvroient chascun de son mestier, et le tout pour les susdictz religieux et religieuses.

Iceulx estoient fourniz de matiere et

estoffe par les mains du seigneur Nausiclete, lequel par chascun an leurs rendoit sept navires des Isles de Perlas et Canibales, chargées de lingotz d'or, de soye crue, de perles et pierreries. Si quelques unions tendoient a vetuste, et changeoient de naifve blancheur: icelles par leur art renouvelloient en les donnant a manger a quelques beaulx cocqs, comme on baille cure es faulcons.