¶Inscription mise sus la grande porte de Theleme. Chap. lii.

Cy n’entrez pas Hypocrites/ bigotz/ Vieulx matagotz/ marmiteux boursouflez.
Tordcoulx badaux plus que n’estoient les Gotz.
Ny Ostrogotz/ precurseurs des magotz/
Haires/ cagotz/ caffars empantouflez.
Gueux mitouflez/ frapars escorniflez
Befflez/ enflez/ fagoteurs de tabus
Tirez ailleurs pour vendre vos abus.
Vos abus meschans
Rempliroient mes champs
De meschansete
Et par faulsete
Troubleroient mes chants
Vos abus meschans.

Cy n’entrez pas maschefains practiciens
Clers bazauchiens mangeurs du popu (laire.
Officiaulx/ scribes/ et pharisiens
Juges/ anciens, que les bons parroiciens
Ainsi que chiens mettez au capulaire.
Vostre salaire est au patibulaire,
Allez y braire: icy n’est faict exces,
Dont en vos cours on deust mouvoir (proces.
Proces et debaz
Peu font cy d’ebatz
Ou l’on vient s’esbatre.
A vous pour debatre
Soient en pleins cabatz
Proces et debatz.

Cy n’entrez pas vous usuriers chichars/
Briffaulx/ leschars/ qui tousjours amassez.
Grippeminaulx/ avalleurs de frimars/
Courbez/ camars, qui en vous coquemars
De mille marcs ja n’auriez assez.
Poinct eguassez n’estes quand cabassez
Et entassez poiltrons a chicheface.
La male mort en ce pas vous deface.
Face non humaine
De telz gents qu’on maine
Braire ailleurs: ceans
Ne seroit seans.
Vuidez ce dommaine
Face non humaine.

Cy n’entrez pas vous rassotez mastins
Soirs ny matins, vieulx chagrins et ja (lous.
Ny vous aussy seditieux mutins
Larves/ lutins/ de dangier palatins/
Grecz ou Latins: plus a craindre que Loups
Ny vous gualous verollez jusqu’a l’ous
Portez vous loups ailleurs paistre en bon (heur
Croustelevez rempliz de deshonneur.
Honneur/ los/ deduict
Ceans est deduict
Par joieux acords.
Tous sont sains au corps,
Par ce bien leur duict
Honneur/ los/ deduict.

Cy entrez vous, et bien soyez venuz
Et parvenuz tous nobles chevaliers.
Cy est le lieu ou sont les revenuz
Bien advenuz: affin que entretenuz
Grands et menuz tous soiez a milliers.
Mes familiers serez et peculiers
Frisques gualliers, joyeux, plaisans
mignons.
En general tous gentilz compaignons.
Compaignons gentilz
Serains et subtilz
Hors de vilite,
De civilite
Cy sont les houstilz
Compaignons gentilz.

Cy entrez vous qui le sainct evangile
En sens agile annoncez, quoy qu’on gronde.
Ceans aurez un refuge et bastille
Contre l’hostile erreur, qui tant postille
Par son faulx stile empoizonner le monde.
Entrez qu’on fonde icy la foy profonde.
Puis qu’on confonde et par voix/ et par rolle
Les ennemys de la saincte parolle.
La parolle saincte
Ja ne soit extaincte
En ce lieu tressainct
Chascun en soyt ceinct,
Chascune ayt enceincte
La parolle saincte.

Cy entrez vous dames de hault paraige
En franc couraige. Entrez y en bon heur.
Fleurs de beaulte a celeste visaige/
A droict corsaige/ et maintien prude et saige/
En ce passaige est le sejour d’honneur.
Le hault seigneur, qui du lieu fut donneur
Et guerdonneur, pour vous l’a ordonne,
Et pour frayer a tout prou or donne,
Or donne par don
Ordonne pardon
A cil qui le donne.
Et tresbien guerdonne
Tout mortel preud’hom
Or donne par don.