Comment Bridoye expose les causes pourquoy il visitoit les procés qu’il decidoit par le sort des dez. Chapitre XL.

Voyre mais (demandoit Trinquamele) mon amy, puis que par sort et iect des dez vous faictez vos jugemens, pourquoy ne livrez vous ceste chanse le jour et heure propre que les parties controverses comparent par davant vous, sans aultre delay? De quoy vous servent les escriptures et aultres procedures contenues dedans les sacs? Comme a vous aultres messieurs (respondit Bridoye) elles me servent de trois choses exquises, requises, et autenticques. Premierement pour la forme, en omission de laquelle ce qu’on a faict n’estre valable prouve tresbien Spec. tit. de instr. edi. et tit. de rescrip. praesent. D’advantaige vous sçavez trop mieux que souvent en procedures judiciaires les formalitez destruisent les materialitez et substances. Car forma mutata mutatur substantia. ff. ad exhib. l. Julianus ff. ad leg. falcid. l. Si is qui quadringenta. Et extra de deci. c. ad audientiam, et de celebra. miss. c. in quadam.

Secondement comme a vous aultres messieurs, me servent d’exercice honneste et salutaire. Feu M. Othoman Vadare grand

Medicin, comme vous diriez. C. de comit. et archi. lib. xij. m’a dict maintes foys que faulte d’exercitation corporelle est cause unicque de peu de santé et briefveté de vie de vous aultres messieurs, et tous officiers de justice. Ce que tresbien avant luy estoit noté par Bart. in. l. j. C. de senten. quae pro eo quod. Pourtant sont comme a vous aultres messieurs, a nous consecutivement, quia accessorium naturam sequitur principalis de reg. iur. lib. vj. et. l. cum principalis. et. l. nihil dolo. ff. eod. titu. ff. de fideiusso. l. fideiussor. et extra de offi. de leg. c. j. concedez certains jeuz d’exercice honeste et recreatif. ff. de al. lus. et aleat. l. solent. et autent. vt omnes obediant, in princ. coll. vij. et ff. de praescript. verb. l. si gratuitam. et. l. j. C. de spect. lib. xj. Et telle est l’opinion D. Thomae in secunda secundae, quaest. clxviij. bien a propous alleguée per D. Alber. de Ros. lequel fuit magnus practicus et docteur solennel, comme atteste Barbatia in prin. consil. La raison est exposée per gl. in prooemio ff. §. ne autem tertij. Interpone tuis interdum gaudia curis. De faict un jour en l’an. 1489. ayant quelque affaire bursal en la chambre de messieurs les Generaulx, et y entrant par permission pecuniaire de l’huissier, comme vous aultres messieurs sçavez que pecuniae obediunt omnia, et la dict Bald. in l. Singularia. ff. si certum pet. et Salic. in l. recepticia. C. de constit. pecun. et Card. in Cle. j. de baptis. Je les trouvay tous jouans a la mousche par exercice salubre avant le past, ou apres: il m’est indifferent pourveu que hic no que le jeu de la mousche est honeste, salubre, antique, et legal a Musco inventore. de quo. C. de petit. haered. l. si post motam: et Muscarij. i. ceulx qui jouent a la mousche sont excusables de droict l. j. C. de excus. artif. lib. x. Et pour lors estoit de mousche. M. Tielman Picquet, il m’en soubvient: et rioyt de ce que messieurs de ladicte chambre guastoient tous leurs bonnetz a force de luy dauber ses espaules: les disoit ce nonobstant n’estre de ce deguast de bonnetz excusables au retour du palais envers leurs femmes par c. i. extra de praesump. et ibi gl. Or resolutorie loquendo je diroys comme vous aultres messieurs, qu’il n’est exercice tel, ne plus aromatisant en ce monde Palatin, que vuider sacs, feueilleter papiers, quotter cayers, emplir paniers, et visiter procés. ex Bart. et Io. de pra. in l. falsa. de condit. et demon. ff.

Tiercement, comme vous aultres messieurs, je consydere que le temps meurist toutes choses: par temps toutes choses viennent en evidence: le temps est pere de Verité. gl. in l. j. C. de seruit. Autent. de restit. et ea quae pa. et Spec. tit. de requis. cons. C’est pourquoy, comme vous aultres messieurs je sursoye, delaye, et differe le jugement: affin que le procés bien ventilé, grabelé, et debatu vieigne par succession de temps a sa maturité: et le sort par apres advenent soit plus doulcettement porté des parties condemnées. comme no. glo. ff. de excu. tut. l. Tria onera. Portatur leviter quod portat quisque libenter. Le jugeant crud, verd, et au commencement, dangier seroit de l’inconvenient que disent les Medicins advenir, quand on perse un aposteme avant qu’il soit meur, quand on purge du corps humain quelque humeur nuysant avant sa concoction. Car comme est escript in Autent. Haec constit. in inno. const. prin. et le repete gl. in c. Caeterum. extra

de iura. calum. Quod medicamenta morbis exhibent, hoc iura negotiis. Nature d’adventaige nous instruict cuillir et manger les fruictz quand ilz sont meurs. instit. de re. di. §. is ad quem. et ff. de acti. empt. l. Julianus. Marier les filles, quand elles sont meures. ff. de donat. int. vir. et uxo. l. cùm hic status. §. si quia sponsa. et 27. q. j. c. Sicut dict gl. Iam matura thoris plenis adoleuerat annis Virginitas, Rien ne faire qu’en toute maturité xxiij. q. ij. §. ult. et xxxiij. d. c. vlt.