Des maladies de ceste annee. Chapitre. iii.

Ceste annee les aveugles ne verront que bien peu, les sourdz oyront assez mal: les muetz ne parleront guieres: les riches se porteront un peu mieulx que les pauvres, et les sains mieulx que les malades. Plusieurs Moutons, Beufz, Pourceaulx, Oysons Pouletz: et Canars, mourront et ne sera sy cruelle mortalité entre les cinges et Dromadaires. Vieillesse sera incurable ceste annee a cause des annees passees. Ceulx qui seront pleureticques auront grand mal au cousté, ceulx qui auront flus de ventre iront souvent a la celle percée, les catharres descendront ceste année du cerveau es membres inferieurs: le mal des yeulx sera fort contraire a la veue, les aureilles seront courtes et rares en Guascongne plus que de coustume. Et regnera quasi universellement, une maladie bien horrible, et redoubtable:

maligne, perverse, espoventable, et mal plaisante, laquelle rendra le monde bien estonné, et dont plusieurs ne scauront de quel boys faire fleches, et bien souvent composeront en ravasserie, syllogisans en la pierre philosophale et es aureilles de Midas. Je tremble de peur quand je y pense. car je vous diz, qu'elle sera epidimiale et l'appelle Averroys vii colliget. Faulte d'argent.Et attendu le comete de l'an passe et la retrogradation de Saturne, mourra a l'hospital un grand marault tout catharré et croustelevé. A la mort du quel sera sedition horrible entre les chatz et les ratz, entre les chiens et les lievres, entre les faulcons et canars, entre les moines et les oeufz.