Entre les merveilles de par dela. c’est qu’il y a de grands Corbeaulx noirs aussi blancs que signes qui vivent en l’air comme vaches qui est une chose digne de admiration: Et d’avantaige il y a foison de chevres verdes qui ont les aureilles plus larges que les ventz dont on venne le bled.

Quant il pleut ou qu’il gresle ceulx qui les meinent paistre se cachent dessoubz de peur d’estre mouliez de la pluye, elles sont cornues, mais elles ont la corne au cul soubz la queue qui n’est pas droictement en bon sens.

Quant elles voyent les gens elles s’en fouyent de peur et courrent fort comme escrevices ou limassons es montaignes d’auvergnemontaignes d’auvergned’auvergne.

Quant elles sont vieilles les gentilz hommes du pays leur font couper les aureilles, et en font des manteaux qui sont fort beaulx, car ilz sont plus fin verdz que le plus fin velours ou satin que vous vissiez jamais.

Apres qu’elles ont les aureilles couppees elles deviennent femmes, et sont nommees chievres coeffees. Il y a plusieurs folz qui en sont si amoureux qu’ilz en perdent les piedz, comme font les amans, lesquelz baisent souvent la cliquette de la porte de celles qu’ilz pensent estre leur amyes.