Comme Panurge et sa compaignie navigerent encore plus oultre, tant qu’ilz arriverent en une isle ou ilz virent choses merveilleuses, et dont ilz furent moult esbahys, car les passages de ladicte isle estoient tant plains de mesnage et aultres choses que l’on n’y povoit passer, par quoy ilz firent venir des habitans et leur demanderent come cela estoit advenu, la responce fut telle. Chapitre XXX.

Puis peu de jours en ca nous avons este fort tormentez de la pluye quant cella commencea a venir et le vous conteray de verbo ad verbum.

Le premier jour sy n’est pas pire
Il gresla febves nouvelles
Et pleut ung jour tables et scabelles
Bancz, selles et chaliz
Et neiga moutons et brebis.

Le second il pleut gelynes
Et gresla potz et chopines
Mille yvrongnes crians la fain
Et pleut troys moys boteaux de foin

Le tyers jour fut aultrement
Il pleut troys jours moulins a vent
Roues, rouelles et chariotz
Et neigea huict jours de beccasses.

Le quart fut bien doloreux
Il pleut cinq jours vaches et beufz
Toreaux pour prendre aulx filez
Et gresla des poys pillez.

Le.v. il pleut enclumes
Barres de fer a grand escumes
Beurre frayz et harencz sales
Et pleut dix mille septiers de bled.

Le.vj. jour est bien certain
Il pleut poelles et potz d’arain
Andouilles, saulcices, et boudins
Et neigea lievres et connyns.

Le.vij. jour au matin
Il pleut tout le jour poinsons de vin
Depuis le matin jusques a vespres
Et vers le soir il pleut des prebstres.

Qui nous faict beaucoup de poyne
La ville en estoit toute plaine
Ilz boivent bien quant il faict trouble
Le pot de bon vin pour ung double.

Le.viij. jour c’est chose vraye
Il pleut belles robbes de soye
De velours et satin cramoisy
Et puis neigea du laict boully
Fromage mol et cresmes doulces
Et puis gresla coupeurs de bources
De vous en garder ayes memoyre
Tant au marche comme a la foyre.

Le.ix. jour il pleut apres
Bringandynes et blancz harnoys
Voulges, picques, et hommes darmes
Et neigea Jacopins et Carmes
Merciers, pignes, et esguillettes
Et apres il pleut tant de fillettes
De cela je n’en doubte rien
Car je croy que tout viendra bien.

Le.x. jour pour abreger
Il pleut des joueurs de bouclyer
Fers a charue et corne de vache
Et plus d’ung cent de sergeans a mace
Baillifz, Vicontes et lieuxtenans
Qui vindrent tous a ung grand vent
Toutes villes en sont fornyes
Jamais on ne veist telles pluyes.

Le.xj. jour furent adventures
Il pleut abayes et masures
Moynes noirs, nonnains, celestins
Chartreux, cordeliers, augustins
Gens aspres assez, je vous asseure
C’est une bonne nourriture
Et puis apres il gresilla
En latin, Ego flagella.

Le.xij. fust bien aultre
Il pleut des escus a la Roze
Des Rydes et des Ducatz
Il pleut ung moys des advocatz
Des notaires et des procureux
Jamais ne furent sy heureux
Ce fut au monde ung grand tresor
Et puis gresla lunettes d’or.

Le.xiij. jour n’est pas lect
Il pleut des gens du mont helet
Chanoynes et coqueluches
Cornars, marmotins, et maries
De cela fut chere ouverte
Ce fust au pays ugne grant perte
Que celluy qui les fit porter
En doint le pays delivrer.

Le.xiiij. jour sans doubtance
Il pleut des loups telle habondance
Que entre Lyon et Vallence
On en eust bien conte soixante
Et apres il pleut des saulmons
Et gresilla tant de chappons
De faysans, de poulailles et de coqz
Cartiers de lart a grandz minotz.

Le.xv. jour et le dernier
Il pleut ung jour quartiers de pain
Que onc de l’estrene brybyers
Ne furent jamais aussy fiers
Et ne faisoient que requerir
Quelqu’ung qui les peust maintenir
Tout le temps de leur vie
Et de faire tousjours telle pluye.

Apres il pleut jattes, corbeilles
Vaisseaux, barilz, plaines bouteilles
Testons de Milan, et gibecieres
Et neigea bateaux et rivieres
Et quant vint apres midy
Il pleut de fromage rosti
Aux oignons, poyres et pommes
Tant de femmes et aussy d’hommes
Et aussi plusieurs gens de guerre
Asses pour le pays conquerre.

Toutes les dessusdictes choses bien entendues par Panurge il commanda a son truchement luy mettre le tout par escript, affin qu’il le peust monstrer a vous mes treshonores lecteurs et auditeurs.